عظمیٰ نیوز سروس
راجوری/پونچھ//پیر پنچال خطے کے اضلاع راجوری اور پونچھ میں بدھ کی صبح سے بارش کا سلسلہ شروع ہوا جو دن بھر وقفے وقفے سے جاری رہا۔ اس بارش نے جہاں موسم کو خوشگوار بنا دیا، وہیں کسانوں کے چہروں پر بھی خوشی کی لہر دوڑا دی ہے کیونکہ یہ بارش زرعی لحاظ سے نہایت مفید سمجھی جا رہی ہے۔خطہ کے نوشہرہ، راجوری، تھنہ منڈی، منجاکوٹ، مینڈھر، پونچھ منڈی اور دیگر ملحقہ علاقوں میں صبح کے وقت ہلکی بارش شروع ہوئی جو دن بھر رک رک کر جاری رہی۔ بعض مقامات پر درمیانی شدت کی بارش بھی ریکارڈ کی گئی، جس سے درجہ حرارت میں نمایاں کمی آئی اور موسم سرد و خوشگوار ہو گیا۔مقامی کسانوں کا کہنا ہے کہ یہ بارش گندم، سرسوں اور دیگر ربیع فصلوں کے لیے انتہائی فائدہ مند ثابت ہوگی۔
ان کے مطابق حالیہ بارش سے زمین میں نمی برقرار رہے گی جس سے فصلوں کی بہتر نشوونما ممکن ہو سکے گی۔ خاص طور پر پہاڑی علاقوں میں جہاں آبپاشی کے محدود وسائل ہیں، وہاں اس قسم کی قدرتی بارش کو نعمت قرار دیا جا رہا ہے۔کاشتکاروں نے بتایا کہ بارش کے باعث فصلوں کو پانی کی کمی کا سامنا نہیں کرنا پڑے گا اور پیداوار میں بھی اضافہ متوقع ہے۔ انہوں نے امید ظاہر کی کہ اگر آئندہ دنوں میں بھی اسی طرح مناسب بارش ہوتی رہی تو اس سال زرعی پیداوار بہتر ہوگی، جس سے مقامی معیشت کو بھی فائدہ پہنچے گا۔دوسری جانب بارش کے باعث کچھ نشیبی علاقوں میں معمولی دقتوں کی بھی اطلاعات ہیں، تاہم مجموعی طور پر صورتحال قابو میں ہے اور کسی بڑے نقصان کی اطلاع نہیں ملی۔ سڑکوں پر پھسلن بڑھنے کے باعث انتظامیہ نے عوام کو احتیاطی تدابیر اختیار کرنے کی ہدایت دی ہے۔ماہرین کے مطابق موجودہ بارش موسمی تبدیلیوں کے تناظر میں بھی اہم ہے کیونکہ یہ خطے میں پانی کے ذخائر کو بہتر بنانے اور زیر زمین پانی کی سطح کو برقرار رکھنے میں مددگار ثابت ہوتی ہے۔مقامی لوگوں نے اس بارش کو رحمت قرار دیتے ہوئے اللہ کا شکر ادا کیا اور امید ظاہر کی کہ آنے والے دنوں میں بھی موسم اسی طرح سازگار رہے گا، تاکہ زراعت کے شعبے کو مزید فروغ مل سکے۔
