عظمیٰ نیوز سروس
سرینگر// صوبائی کمشنر کشمیر، انشول گرگ نے جمعرات کو ایک میٹنگ کی صدارت کی جس میں پارکنگ سائٹس، سڑکوں اور پلوں کے لیے تفصیلی پروجیکٹ رپورٹس (DPRs) کو حتمی شکل دینے کا جائزہ لینے کے علاوہ ٹریفک کی ہموار آمدورفت کو یقینی بنانے اور سری نگر کی بھیڑ کو کم کرنے پر تبادلہ خیال کیا گیا ۔افسران سے خطاب کرتے ہوئے ڈویژنل کمشنر نے تمام محکموں کو ہدایت کی کہ وہ سڑکوں، پلوں اور پارکنگ جگہوں سے متعلق ترقیاتی منصوبوں کی رپورٹس بشمول منظور شدہ کاموں کی تفصیلات، پیش کردہ تجاویز اور نئے پراجیکٹ کی تجاویز پیش کریں۔
انہوں نے محکموں کو ہدایت کی کہ وہ پیر تک مجوزہ مداخلتوں کے ساتھ ٹریفک کے بلیک اسپاٹس اور رکاوٹوں کے بارے میں رپورٹ پیش کریں۔سری نگر سمارٹ سٹی لمیٹڈ کے سی ای او کو ای-بس روٹس کو معقول بنانے، ٹائم شیڈول کی پابندی کو یقینی بنانے اور مناسب بس سٹاپ مقرر کرنے کی ہدایت دی گئی۔آر اینڈ بی ڈپارٹمنٹ اور بارڈر روڈز آرگنائزیشن (بیکن) سے پارم پورہ سے ناربل تک قومی شاہراہ کے ساتھ کراسنگ کی بندش کے بارے میں رپورٹ پیش کرنے کو کہا گیا ۔ڈویژنل کمشنر نے ایس ایس پی ٹریفک پر زور دیا کہ وہ ٹریفک ضابطوں کے موثر نفاذ اور چالان بنانے کے لیے ITMS کیمروں کے زیادہ سے زیادہ استعمال کو یقینی بنائیں۔ سی ای او ایس ایس سی ایل کو ہدایت کی گئی کہ وہ سڑکوں پر اسٹاپ لائنوں کی پینٹنگ اور زیبرا کراسنگ کی نشان دہی کو یقینی بنائیں۔ڈویڑنل کمشنر نے ہدایت کی کہ آئی ٹی پر مبنی کار پارکنگ کا کام 31 مارچ تک مکمل کیا جائے۔محکمہ آر اینڈ بی کو دریائے جہلم پر اندرون ملک آبی گزرگاہوں کی نقل و حمل کی سہولت کے لیے مداخلت کی ضرورت والے پلوں کی نشاندہی کرنے والی رپورٹ پیش کرنے کی بھی ہدایت کی گئی۔
