جموں وکشمیر میں2025کی قدرتی آفت

 جموں خطے میں 2645اورکشمیر وادی میں 125شامل،100کروڑ جاری :حکومت

عظمیٰ نیوزسروس

جموں//جموں و کشمیر حکومت نے قانون ساز اسمبلی کو مطلع کیا کہ گزشتہ سال مرکز کے زیر انتظام علاقے میں آنے والی قدرتی آفت کی وجہ سے 2770سکولوں کی عمارتوں کو نقصان پہنچا ہے۔ان میں سے2645عمارتیں جموں ڈویژن میں اور 125کشمیر ڈویژن میں ہیں۔حکومت کی جانب سے یہ معلومات ممبراسمبلی سنیل بھاردواج یودھویر سنگھ، طارق حمید قرہ اور ڈاکٹر نریندر سنگھ رینا کی طرف سے اٹھائے گئے ایک سوال کے جواب میں فراہم کی گئی، جنہوں نے سڑکوں، سرکاری عمارتوں، واٹر سپلائی اسکیموں، پبلک انفراسٹرکچر، تجارتی اداروں اور رہائشی مکانات کو پہنچنے والے نقصانات کی تفصیلات مانگی تھیں۔حکومت نے کہا کہ موجودہ مالی سال2025-26کے دوران کیپیکس بجٹ کے تحت بحالی کے کاموںکیلئے100کروڑ روپے کی رقم جاری کی گئی ہے، جس میں ہر ضلع کیلئے 5کروڑ روپے ’سیلاب سے متعلق امدادی اقدامات‘کے عنوان کے تحت مختص کیے گئے ہیں۔

حکومت نے ایوان کو بتایاکہ یہ ریلیز متاثرہ علاقوں میں حالیہ سیلاب کی وجہ سے ہونے والے نقصانات کی وجہ سے ضروری بحالی کے کاموں کی بروقت تکمیل کو یقینی بنانے کے لیے کی گئی تھی۔حکومت کے جواب میں مزید کہا گیا کہ، یکم دسمبر 2025 کو منعقدہ بجٹ اجلاس کے دوران محکمہ خزانہ کی ہدایات کے بعد، تمام ڈپٹی کمشنروں سے کہا گیا کہ وہ مارچ2026 کے آخر تک فنڈز کی اصل ضرورت کا جائزہ لیں اور اس کی منصوبہ بندی کریں۔جموں ڈویڑن میں نقصانات کا بریک اپ فراہم کرتے ہوئے، حکومت نے کہا کہ 971پرائمری سکول،889مڈل سکول، 251ہائی سکول اور 156ہائیر سیکنڈری سکول متاثر ہوئے۔ضلع کے لحاظ سے، سب سے زیادہ تباہ شدہ عمارتیں جموں ضلع سے (843)، اس کے بعد ادھم پور (448)، ڈوڈہ (304)، راجوری (245)، کٹھوعہ (208)، کشتواڑ (202)، پونچھ (175)، ریاسی (118)، سانبہ (61) اور رام بن (41) ہیں۔کشمیر ڈویڑن میں 125 سکولوں کی عمارتوں کو نقصان پہنچا جن میں سری نگر میں3، بڈگام میں 20، گاندربل میں 3، اننت ناگ میں 43، پلوامہ میں41، کولگام میں 11 اور بارہمولہ میں 4سکولی عمارتیں شامل ہیں۔ان میں 30 پرائمری سکول،82 مڈل سکول، 10 ہائی سکول اور 3 ہائیر سیکنڈری سکولوں کے ڈھانچے کو نقصان پہنچا۔ 7کو مستقل بحالی کی ضرورت ہے، جبکہ باقی عمارتوں کی عارضی مرمت کی جائے گی۔

جموں و کشمیر میں 2.81لاکھ کنال زمین دفاعی اداروں کےزیر تصرف
معاوضے اور انتظامی مسائل سے زمین مالکان متاثر، حکومت کا اسمبلی میں اعتراف

عظمیٰ نیوزسروس

جموں//جموں و کشمیر حکومت نے اسمبلی کو بتایا کہ یونین ٹیریٹری میں 2,81,082کنال اور 10مرلہ زمین فوج اور دیگر دفاعی اداروں کے قبضے یا استعمال میں ہے، جس میں نمایاں حصہ نجی زمین پر مشتمل ہے، اور کئی اضلاع میں معاوضے اور قانونی پیچیدگیوں کی وجہ سے زمین مالکان متاثر ہیں۔یہ معلومات ایم ایل اے بلونت سنگھ منکوٹیاکے سوال کے جواب میں محکمہ ریونیو نے فراہم کیں۔ اعداد و شمار کے مطابق سب سے زیادہ زمین جموں ضلع میں ہے (93,671کنال)، اس کے بعد بڈگام(75,772کنال سے زائد)، ادھمپور (31,091کنال)اوربارہمولہ (20,365کنال سے زائد) ہے۔ دیگر اضلاع میں قابل ذکر دفاعی قبضہ پلوامہ (20,896کنال)، پونچھ(21,000کنال سے زائد)، راجوری(21,145کنال)، کٹھوعہ(14,765کنال) اور کپوارہ (10,366کنال سے زائد) شامل ہیں، جبکہ سری نگر، شوپیاں، کولگام اور گاندربل میں نسبتاً کم زمینیں دفاعی استعمال میں ہیں۔حکومت نے بتایا کہ جہاں زمین باقاعدہ طور پر حاصل کی گئی ہے، وہاں معاوضہ زیادہ تر ادا کر دیا گیا ہے، اور جو زمین عارضی طور پر استعمال میں ہے اس کے لیے کرایہ ادا کیا جا رہا ہے۔ تاہم کئی معاملات ابھی زیر التوا ہیں، خاص طور پر جموں اور پونچھ میں قانونی پیچیدگیوں، عنوان کے تنازعات، دستاویزات کی کمی اور انتظامی تاخیر کی وجہ سے۔مزید بتایا گیا کہ ریونیو ریکارڈ کی ڈیجیٹائزیشن جاری ہے، ہزاروں جمع بندیاں سکین کی جا چکی ہیں، اور کئی خدمات آن لائن پلیٹ فارمز جیسے روینو پلس اور جن سوگم کے ذریعے دستیاب ہیں، لیکن بعض معاملات میں فیلڈ ویریفیکیشن کے لیے درخواست دہندگان کی موجودگی لازمی ہے۔زمین کے استعمال کے ضوابط کے حوالے سے حکومت نے بتایا کہ ستمبر 2025 میں ڈپٹی چیف منسٹر کی سربراہی میں ایک اعلیٰ سطحی کمیٹی قائم کی گئی تھی تاکہ زمین کے استعمال میں تبدیلی، بشمول کھڈ (دریائی یا سیلابی زمین) کے معاملات کا جائزہ لیا جا سکے۔ کمیٹی کی رپورٹ کے بعد مزید کارروائی ہوگی۔حکومت نے یہ بھی انکشاف کیا کہ سینکڑوں زمین کے استعمال کی تبدیلی کے کیسز مختلف اضلاع میں زیر التوا ہیں، بنیادی طور پر مختلف محکموں سے این او سی نہ ملنے اور درخواست دہندگان کی جانب سے ضروری فیس ادا نہ کرنے کی وجہ سے۔

جے ڈی اے کی 16ہزار کنال سے زائد اراضی پر قبضہ:حکومت
مرحلہ وار بے دخلی مہم جاری، قابضین کیخلاف کارروائی تیز کرنے کا اعلان

عظمیٰ نیوزسروس
جموں//جموں و کشمیر کے وزیر اعلیٰ عمر عبداللہ نے جمعرات کو اسمبلی میں بتایا کہ جموں ڈیولپمنٹ اتھارٹی کی 1 ہزار کنال سے زائد زمین اس وقت غیر قانونی قبضے میں ہے، جبکہ قابضین کے خلاف مرحلہ وار اور مقررہ مدت کے تحت بے دخلی مہم جاری ہے۔بی جے پی کے رکن اسمبلی ڈاکٹر نریندر سنگھ رینا کے سوال کے جواب میں وزیر اعلیٰ نے کہا کہ جے ڈی اے کے زیر انتظام کل زمین 80,976کنال اور 10مرلہ ہے، جس میں سے 16,127کنال اور 10مرلہ زمین پر ناجائز قبضہ کیا گیا ہے۔ انہوں نے بتایا کہ قبضوں کی نشاندہی فیلڈ عملے کی جانب سے معائنوں اور محکمہ مال کے ریکارڈ کی بنیاد پر کی جاتی ہے۔وزیر اعلیٰ نے کہا کہ ‘‘غیر مجاز قابضین کے خلاف جموں و کشمیر پبلک پریمیسز (بے دخلی) ایکٹ کے تحت نوٹس جاری کیے جاتے ہیں، جبکہ ضلعی انتظامیہ اور پولیس کے اشتراک سے باقاعدہ انہدام اور بے دخلی مہم چلائی جاتی ہے۔انہوں نے مزید کہا کہ نئے قبضوں کو روکنے کے لیے باقاعدگی سے فیلڈ معائنہ کیا جا رہا ہے اور غیر قانونی قابضین کو ہٹانے کا عمل قانونی تقاضوں کے مطابق مرحلہ وار اور وقت کی پابندی کے ساتھ جاری ہے۔قابضین کی تفصیلات سے متعلق سوال پر عمر عبداللہ نے کہا کہ جے ڈی اے کے پاس ایسی درجہ بندی موجود نہیں ہے کہ قابضین سیاستدان، بیوروکریٹس، نجی افراد یا تنظیمیں ہیں۔انہوں نے وضاحت کی کہ ‘‘قابضین کی فہرستیں محکمہ مال سے موصول ہوتی ہیں اور انہیں زمین کے ٹکڑوں یا مقامات کے حساب سے مرتب کیا جاتا ہے’’، اور اس بات پر زور دیا کہ تمام کارروائیاں شفافیت اور جوابدہی کو یقینی بنانے کے لیے قانونی دائرے میں رہ کر انجام دی جا رہی ہیں۔

جموں میں 233غیر قانونی ڈھانچوں کی نشاندہی کی گئی
۔61غیر قانونی تجارتی ڈھانچے ضوابط کی خلاف ورزی پر منہدم:حکومت

عظمیٰ نیوزسروس

جموں //جموں و کشمیر حکومت کا کہنا ہے کہ جموں شہر میں گزشتہ 13ماہ میں کل 233غیر قانونی تجارتی اور رہائشی ڈھانچوں کی نشاندہی کی گئی ہے۔قانون ساز اسمبلی میں بی جے پی کے ممبر اسمبلی اے وکرم رندھاوا کے سوال کے جواب میںحکومت نے کہا کہ خلاف ورزیاں 122 رہائشی ڈھانچے، 107تجارتی اداروں اور چار مخلوط رہائشی تجارتی استعمال کے تحت آتی ہیں۔مزید تفصیلات فراہم کرتے ہوئے حکام نے بتایا کہ جولائی 2025 سے فروری 2026 کے درمیان تعمیراتی اصولوں کی خلاف ورزی پر کام کرنے والے 64تجارتی ڈھانچے کو سیل کیا گیا تھا۔ انہوں نے کہا ’’ اکتوبر 2024سے لیکر اب تک تقریباً 61غیر قانونی تجارتی ڈھانچے کو مناسب اجازت کے بغیر اور مقررہ ضوابط کی خلاف ورزی پر کام کرنے پر منہدم کیا جا چکا ہے‘‘۔تاہم، اس نے کہا کہ جموں ڈیولپمنٹ اتھارٹی (جے ڈی اے) کے ذریعہ غیر مجاز کمیونٹی ہالوں، بینکوئٹ ہالوں اور اسی طرح کے اداروں کے بارے میں علیحدہ ڈیٹا برقرار نہیں رکھا گیا ہے۔تمام غیر مجاز تعمیرات کے خلاف بلڈنگ بائی لاز اور COBO ایکٹ 1988کے مطابق کارروائی کی جا رہی ہے۔جواب میں مزید کہا گیا کہ بینکوئٹ ہالز کے مالکان کی جانب سے 2010 میں دائر کی گئی ایک رٹ پٹیشن ہائی کورٹ میں زیر التوا ہے جس نے ہدایت کی تھی کہ آئندہ احکامات تک ایسے اداروں کو بند نہ کیا جائے۔غیر قانونی پارکنگ آپریشنز پر حکومت نے کہا کہ ناروال میں آر ٹی او آفس کے قریب جے ڈی اے پارکنگ لاٹ میں پارکنگ چارجز کی غیر مجاز وصولی کے بارے میں شکایت موصول ہوئی تھی۔شکایت پر کارروائی کرتے ہوئے، قانون کی متعلقہ دفعات کے تحت ملزم کے خلاف ایف آئی آر درج کرنے کی ہدایات جاری کی گئیں۔ نفاذ کے بارے میں، حکومت نے کہا کہ ابھی تک ٹھیکیداروں کو منظور شدہ گنجائش سے زیادہ پارکنگ کی اجازت دینے کی کوئی مثال سامنے نہیں آئی ہے، لیکن خلاف ورزی کی صورت میں سخت کارروائی کی جائے گی۔جوابدہی پر، اس نے کہا کہ غلطی کرنے والے اہلکاروں کے خلاف تادیبی کارروائی شروع کی گئی ہے، جس میں وارننگ، ریڈ انٹری، معطلی اور تبادلے شامل ہیں۔ اس میں مزید کہا گیا کہ جے ڈی اے کے دو عہدیداروں کو معطل کردیا گیا ہے جبکہ ایک کو انفورسمنٹ ونگ سے غیر موثر ہونے پر منتقل کردیا گیا ہے۔اس میں کہا گیا ہے کہ جموں ساؤتھ میں جے ڈی اے کی اراضی پر قبضہ کرنے میں مبینہ طور پر ملوث ہونے کے الزام میں عہدیداروں نے پنکج سمبیال اور رومیش کمار کے سروس ریکارڈ میں سرخ اندراجات بھی کیے گئے ہیں۔