جاوید اقبال
مینڈھر // جاوید احمد رانا، وزیر جل شکتی، جنگلات، ماحولیات و قبائلی امور نے آئی ڈی پی ایس مینڈھر کی سالانہ تقریب میں شرکت کی، جہاں انہوں نے طلبہ کی تعلیمی ترقی کے ساتھ ساتھ ان کی کردار سازی کی اہمیت کو اجاگر کیا۔طلبہ، اساتذہ اور والدین کے ایک پْرجوش اجتماع سے خطاب کرتے ہوئے وزیر موصوف نے کہا کہ موجودہ دور تیز رفتار ٹیکنالوجی کا دور ہے جس نے تعلیم کے بے شمار نئے مواقع فراہم کیے ہیں، تاہم اس کے ساتھ طلبہ میں مضبوط اخلاقی اقدار، نظم و ضبط اور ذمہ داری کا احساس پیدا کرنا بھی نہایت ضروری ہو گیا ہے۔
انہوں نے کہا کہ صرف تعلیمی کامیابی ہی کافی نہیں بلکہ اس کے ساتھ اخلاقی تربیت اور سماجی شعور کا ہونا بھی بے حد اہم ہے، تاکہ طلبہ ایک متوازن اور ذمہ دار شہری بن سکیں۔وزیر موصوف نے اساتذہ اور والدین کے کردار پر زور دیتے ہوئے کہا کہ بچوں کی بہترین تربیت ایک مشترکہ ذمہ داری ہے، جس کے لیے دونوں کو مل کر کام کرنا ہوگا تاکہ نئی نسل کو ہمہ جہتی شخصیت کا حامل بنایا جا سکے۔جاوید احمد رانا نے مزید کہا کہ تعلیم کا مقصد صرف ذہنی نشوونما تک محدود نہیں بلکہ اس میں جسمانی، جذباتی اور سماجی ترقی بھی شامل ہے۔ انہوں نے نوجوانوں میں برداشت، دیانتداری اور ہمدردی جیسے اوصاف کو فروغ دینے کی ضرورت پر زور دیا تاکہ وہ معاشرے میں مثبت کردار ادا کر سکیں۔انہوں نے تعلیمی اداروں میں بھائی چارے اور سماجی ہم آہنگی کی اہمیت کو اجاگر کرتے ہوئے کہا کہ طلبہ میں ابتدا سے ہی تنوع کے احترام اور شمولیت کے جذبے کو فروغ دینا ایک مضبوط اور متحد معاشرے کی بنیاد ہے۔وزیر موصوف نے اسکول انتظامیہ اور عملے کی کاوشوں کو سراہتے ہوئے کہا کہ وہ معیاری تعلیم کی فراہمی اور طلبہ کو اپنی صلاحیتیں نکھارنے کے مواقع فراہم کرنے میں اہم کردار ادا کر رہے ہیں۔تقریب کے دوران طلبہ نے مختلف ثقافتی پروگرام پیش کیے، جن میں ان کی تخلیقی صلاحیتوں، اعتماد اور خوشی کا خوبصورت اظہار دیکھنے کو ملا، جس نے حاضرین کو خوب محظوظ کیا۔
