ہندوستانی تارکین وطن’ترقی یافتہ ہندوستان‘ نظریہ کا لازمی حصہ : مرمو

یواین آئی

نئی دہلی// صدر جمہوریہ دروپدی مرمو نے کہا ہے کہ 2047 تک ہندوستان کو ترقی یافتہ ملک بنانا ایک قومی مشن ہے اور اس میں این آر آئی سمیت ہر ہندوستانی کی فعال اور پرجوش شرکت ضروری ہے۔ مرمو نے بھونیشور، اڈیشہ میں 18ویں پرواسی بھارتیہ دیوس کانفرنس کے اختتامی اجلاس سے خطاب کیا اور پرواسی بھارتیہ سمان ایوارڈ پیش کیا۔انہوں نے کہا کہ ہندوستانی تارکین وطن سال 2047 تک ملک کو ترقی یافتہ بنانے کے وڑن کا ایک لازمی حصہ ہیں۔ انہوں نے کہا کہ آج ہمارا ملک 2047 تک ترقی یافتہ ہندوستان کی طرف بڑھ رہا ہے۔ یہ ایک قومی مشن ہے جس میں بیرون ملک رہنے والوں سمیت ہر ہندوستانی کی فعال اور پرجوش شرکت کی ضرورت ہے۔ بیرون ملک مقیم ہندوستانی اس وڑن کا لازمی حصہ ہیں۔ ان کی عالمی موجودگی انہیں ایک منفرد نقطہ نظر فراہم کرتی ہے اور ان کی کامیابیاں انہیں ایک ترقی یافتہ ہندوستان کی تعمیر میں اہم کردار ادا کرنے کی پوزیشن میں رکھتی ہیں۔صدر جمہوریہ نے کہا کہ ہندوستانی تارکین وطن ملک کی بہترین شناخت ہیں۔ وہ اپنے ساتھ نہ صرف اس مقدس سرزمین میں حاصل کردہ علم اور ہنر لے کر آئے بلکہ وہ اقدار اور اخلاق بھی لائے جو صدیوں سے ہماری تہذیب کی بنیاد رہے ہیں۔ ٹکنالوجی، طب، آرٹس یا انٹرپرینیورشپ کے میدان میں ہوں، ڈائیسپورا میں ہندوستانیوں نے ایک ایسا نشان چھوڑا ہے جسے دنیا تسلیم کرتی ہے اور ان کا احترام کرتی ہے۔ صدر جمہوریہ نے تمام پرواسی بھارتی سمان جیتنے والوں کو مبارکباد پیش کی۔ صدر نے کہا کہ ان کی کامیابی کی کہانیاں نہ صرف ہندوستان کے لیے باعث فخر ہیں بلکہ وہ دنیا بھر کے لاکھوں لوگوں کو بہترین کارکردگی کے لیے جدوجہد کرنے کی ترغیب دیتے ہیں۔