عظمیٰ ویب ڈیسک
سری نگر//منشیات کے خلاف جنگ کو وسیع پیمانے پر جاری رکھتے ہوئے پولیس نے وسطی کشمیر کے ضلع گاندربل میں ایک بدنام زمانہ منشیات فروش کو پی آئی ٹی این ڈی پی ایس ایکٹ کے تحت گرفتار کرکے ضلع جیل اودھم پور منتقل کیا ہے۔
ایک پولیس ترجمان نے اپنے ایک بیان میں کہا کہ مجاز اتھارٹی سے با قاعدہ اجازت حاصل کرنے کے بعد گاندربل پولیس نے ایک بدنام زمانہ منشیات فروش کو پی آئی ٹی این ڈی پی ایس ایکٹ کے تحت گرفتار کیا ہے۔انہوں نے کہا: ‘ملزم کو منشیات فروشی میں مسلسل ملوث پایا گیا جو بنیادی طور پر مقامی نوجوانوں کو ٹارگیٹ کر رہا تھا’۔ان کا کہنا تھا کہ گرفتاری کا حکمنامہ جاری ہونے کے بعد اس کو گرفتار کرکے ضلع جیل اودھم پور منتقل کیا گیا۔
ملزم کی شناخت جمشید مقبول وانی ولد محمد مقبول وانی ساکن وانی محلہ صفا پورہ کے طور پر کی گئی ہے۔پولیس ترجمان نے بتایا کہ یہ فیصلہ کن کارروائی گاندربل پولیس کے ڈرگ مافیا کے خلاف عزم کو اجاگر کرتی ہے۔انہوں نے کہا کہ پولیس منشیات کی وبا کا قلع قمع کرنے کے لئے پر عزم ہے تاکہ نوجوان نسل کو اس آفت سے بچایا جاسکے۔
گاندربل میں منشیات فروش پی آئی ٹی این ڈی پی ایس ایکٹ کے تحت گرفتار:پولیس
