عظمیٰ سپورٹس ڈیسک
نئی دہلی//ٹی20 ورلڈ کپ جیتنے والی بھارتی ٹیم کے ہیڈ کوچ راہل ڈریوڈ نے اعلیٰ مثال قائم کردی۔ ٹی 20 ورلڈ کپ جیتنے کے بعد بی سی سی آئی نے ٹیم، کوچز اور سپورٹ اسٹاف کے لیے نقد 125 کروڑ روپے انعام کا اعلان کیا تھا۔ اس مجموعی رقم میں سے ہیڈ کوچ راہل ڈریوڈ کے حصے میں 5 کروڑ جبکہ دیگر کوچز کے حصے میں ڈھائی کروڑ روپے آنے تھے۔ ڈریوڈ نے کرکٹ بورڈ سے اپنی انعامی رقم کم کرنے کے بارے میں کہا۔ انہوں نے کرکٹ بورڈ سے کہا کہ وہ بیٹنگ، بولنگ اور فیلڈنگ کوچز کے مقابلے میں زیادہ رقم حاصل نہیں کرنا چاہتے۔ ڈریوڈ بیٹنگ، بولنگ اور فیلڈنگ کوچ کے برابر ہی انعامی رقم وصول کرنا چاہتے ہیں۔بی سی سی آئی کی جانب سے کہا گیا ہے کہ بورڈ راہول ڈریوڈ کے جذبات کی عزت کرتا ہے۔ اس سے قبل 2018ء میں بھی انڈر 19 ورلڈ کپ جیتنے والی ٹیم کے ہیڈ کوچ راہل ڈریوڈ نے اسی قسم کا فیصلہ کیا تھا۔
