پینے کا صاف پانی فراہم کرنا حکومت کی اولین ترجیح :شام

جموں//پی ایچ ای، آبپاشی اور فلڈ کنٹرول کے وزیر شام لال چودھری نے کہا ہے کہ ریاست کے لوگوں کو پینے کا صاف پانی فراہم کرنا حکومت کی اولین ترجیح ہے۔ انہوں نے کہا کہ رواں برس کے دوران 108 واٹر سپلائی سکیموں کو مکمل کیا جائے گا۔وزیر نے ان باتوں کا اظہار پی ایچ ای، اری گیشن اور فلڈ کنٹرول محکموں میں کیپکس بجٹ کے تحت حصولیابیوں کا جائیزہ لینے کی غرض سے منعقدہ ایک میٹنگ سے خطاب کر تے ہوئے کیا۔وزیر موصوف نے ضلع اور سیکٹروں کی بنیاد پر سکیموں اور پروجیکٹوں کی عمل آوری کا جائیزہ لیا۔ انہوں نے متعلقین پر زور دیا کہ وہ کیپکس بجٹ اور دیگر سکیموں کے تحت منظور کی گئی رقومات کا منصفانہ اور بھرپور تصرف یقینی بنائیں۔شام چودھری نے کہا کہ پروجیکٹوں کو مقررہ مدت کے اندر مکمل کرنے میں حائل کسی بھی رکاوٹ کو دور کیا جانا چاہئے۔ انہوں نے افسروں پر زور دیا کہ وہ مزید لگن اور تندہی کے ساتھ کام کر کے اہداف کو حاصل کریں۔وزیر نے آبپاشی و فلڈ کنٹرول محکمہ کے کام کاج پر برہمی کا اظہار کرتے ہوئے کہا کہ ایس ڈی آر ایف کے تحت مکمل کئے گئے کاموں کی ادائیگی کو یقینی بنایا جانا چاہئے کیوں کہ رقومات کی کوئی کمی نہیں ہے۔میٹنگ میں بتایا گیا کہ این آر ڈی ڈبلیو پی کے تحت85.01 کروڑ روپے واگذار کئے گئے ہیں جبکہ رواں سال کے لئے 108 واٹر سپلائی سکیمیں مکمل کرنے کا نشانہ مقرر کیا گیا ہے۔ ان پر اب تک72.21 کروڑ روپے صرف کئے گئے ہیں اوران سکیموں کی بدولت169 بستیوں کے13 لاکھ افراد کو فائدہ ملے گا۔میٹنگ میں متعلقہ محکموں کے کئی اعلیٰ افسران بھی موجود تھے۔