نئی دہلی//فوجی سربراہ لیفٹیننٹ جنرل مکند منوج نروانے ، نے کہا ہے کہ پاکستان کی جانب سے جموں کشمیر میں جنگجوئوں کیلئے ڈرون کے ذریعے ہتھیار سپلائی کرنے کے واقعات میں اضافہ کے بعد کنٹرول لائن پر فوج کو متحرک کر دیا گیا ہے۔ جنرل مکند منوج نروانے ،نے کہا کہ فوج کو الرٹ کرکے ہدایت دی گئی ہے کہ لائن آف کنٹرول کے نزدیک فضا میں چلنے والی ہر چیز پر باریک بینی سے نظر رکھی جائے ۔انہوں نے مزید بتایا کہ سرحدوں پر ڈورن مخالف آلات نصب کئے گئے ہیں جو کسی بھی کوشش کو ناکام بنا سکتے ہیں ۔فوجی سربراہ نے بتایا کہ جموں کے پیر پنچال علاقے میں ڈورن سرگرمیوں کے بڑھتے واقعات کے بعد لائن آف کنٹرول پر چوکسی برتی جارہی ہے۔ نروانے ،نے بتایا کہ کشمیر میں سرگرم جنگجو ئوں میں ہتھیاروں کی کافی کمی محسوس ہو رہی ہے اور وہ سرحد پار سے مدد کیلئے بے چین ہیں ۔ انہوں نے بتایا کہ پاکستان ان عسکریت پسندوں کو ہتھیار سپلائی کرنے کی ہر ممکن کوشش کر رہا ہے ۔ انہوں نے کہا کہ گزشتہ ماہ لائن آف کنٹرول پر جموں میں ایک ڈرون مار گر ایا گیا اور ہتھیاروں کی بھاری کھیپ ضبط کر لی گئی جو کشمیر میں سرگرم جنگجوئوں کیلئے سپلائی کی جارہی تھی ۔۔ انہوں نے بتایا کہ کنٹرول لائن پر پاکستانی سرگرمیوں پر نظر گزر رکھنے کیلئے چھوٹے ڈرون استعمال کئے جارہے ہیں ۔ انہوںنے بتایا کہ سرحدوں پر عام شہری نقل و حمل پر بھی کڑی نظر رکھی جا رہی ہے اور فوج کو بھی ہدایت بھی دی گئی ہے کہ وہ کسی بھی کوشش کو ناکام بنانے کیلئے الرٹ رہیں۔