نکسل ازم آخری سانسیں لے رہا ہے | 14نکسلیوں کی ہلاکت اس بات کا ثبوت:شاہ

یو این آئی

نئی دہلی//مرکزی وزیر داخلہ امت شاہ نے منگل کو اوڈیشہ چھتیس گڑھ سرحد پر ایک مشترکہ آپریشن میں 14نکسلیوں کو مارے جانے پر سیکورٹی فورسز کی تعریف کرتے ہوئے کہا کہ یہ نکسل ازم پر ایک اور مضبوط حملہ ہے۔ شاہ نے سوشل میڈیا پلیٹ فارم ایکس پر کہا’’ نکسل ازم پر ایک اور مضبوط حملہ۔ ہماری سیکورٹی فورسز نے نکسل سے پاک ہندوستان کی تعمیر میں بڑی کامیابی حاصل کی ہے۔ سی آر پی ایف، ایس او جی اوڈیشہ اور چھتیس گڑھ پولیس نے اوڈیشہ-چھتیس گڑھ سرحد پر مشترکہ آپریشن میں 14 نکسلیوں کو ہلاک کر دیا‘‘۔اانہوں نے کہا کہ نکسل ازم سے پاک ہندوستان کے ہمارے عزم اور ہماری سیکورٹی فورسز کی مشترکہ کوششوں کی وجہ سے آج نکسل ازم اپنی آخری سانسیں لے رہا ہے۔قابل ذکر ہے کہ اوڈیشہ اور چھتیس گڑھ پولیس اور سی آر پی ایف کے جوانوں کے ہاتھوں اوڈیشہ کے نواپڈا ضلع کی سرحد سے صرف پانچ کلومیٹر دور چھتیس گڑھ کے کولاری گھاٹ ریزرو جنگل میں مشترکہ آپریشن میں کم از کم 14 ما نواز مارے گئے ہیں۔