شاہراہ پر بھاری پسی گر آئی

بانہال//  جموں سرینگر شاہراہ پر بدھ کو گاڑیوں کی آمدورفت کم از کم 8 گھنٹوں تک بند رہی۔ڈی ایس پی ٹریفک بانہال شمشیر سنگھ نے کشمیر عظمیٰ کو بتایا کہ بدھ کی علی الصبح تین بجے بانہال کے نزدیک شابن باس کے مقام پر ایک بھاری پسی کیساتھ بہت سارا ملبہ سڑک پر گر آیا اور ایک ٹینکر بھی پسی کے ملبے میں دھنس گیا۔ انہوں نے کہا کہ تعمیراتی کمپنی کی مشینری کی مدد سے خالی ٹینکر کو کھینچ کر ملبے سے باہر نکالا گیا اور سڑک کے باقی حصے پر گرے بھاری ملبے کو صاف کرنے کا آغاز کیا گیا جس میں 8گھنٹے لگ گئے۔ملبہ صاف کرنے کے بعد ٹریفک کو دن کے گیارہ بجے دوبارہ بحال کیا گیا۔انہوں نے کہا کہ بانہال پسی اور جواہر ٹنل کے درمیان شاہراہ بند ہونے کی وجہ سے درماندہ ٹریفک کو بدھ کی شام تک نکالا گیا۔ آج ٹریفک کو جموں سے سرینگر کی طرف آنے کی اجازت ہوگی۔