امرناتھ یاترا کے لیے کثیر سطحی سکیورٹی گرڈ قائم، تمام ایجنسیاں مکمل ہم آہنگی سے کام کر رہی ہیں: آئی جی پی کشمیر

عظمیٰ ویب ڈیسک
سرینگر/انسپکٹر جنرل آف پولیس کشمیر ودھی کمار بردی نے کہا ہے کہ امرناتھ یاترا کے پُرامن، محفوظ اور کامیاب انعقاد کو یقینی بنانے کے لیے کثیر سطحی سکیورٹی گرڈ قائم کیا گیا ہے اور تمام سکیورٹی ایجنسیاں باہمی تال میل کے ساتھ اپنی ذمہ داریاں انجام دے رہی ہیں۔
سرینگر میں نامہ نگاروں سے گفتگو کرتے ہوئے آئی جی پی کشمیر نے کہا کہ کسی بھی ہنگامی صورتحال یا غیر متوقع واقعے سے مؤثر انداز میں نمٹنے کے لیے مختلف سکیورٹی ایجنسیوں کی جانب سے وسیع پیمانے پر فرضی مشقیں (Mock Drills) منعقد کی گئی ہیں، تاکہ ہر متعلقہ ادارہ اپنی ذمہ داریوں اور کردار سے مکمل طور پر آگاہ رہے۔
انہوں نے کہا کہ ان مشقوں کا مقصد یہ یقینی بنانا ہے کہ کسی بھی ہنگامی صورت حال میں تمام متعلقہ ادارے مربوط انداز میں فوری کارروائی کر سکیں۔
ودھی کمار بردی نے بتایا کہ یاترا روٹ اور اس سے ملحقہ علاقوں کی نگرانی کے لیے بلند مقامات سے مسلسل مانیٹرنگ اور سپرویژن بھی کی جا رہی ہے تاکہ ہر سرگرمی پر کڑی نظر رکھی جا سکے۔
انہوں نے مزید کہا کہ یاترا کے کئی حصے قدرتی آفات جیسے لینڈ سلائیڈنگ، برفانی تودے گرنے اور گلیشیئر کی نقل و حرکت کے حوالے سے حساس ہیں۔ ان خطرات سے نمٹنے کے لیے متعلقہ ایجنسیوں نے ٹیبل ٹاپ مشقیں (Tabletop Exercises) بھی انجام دی ہیں۔
آئی جی پی کشمیر کے مطابق حساس مقامات پر میڈیکل ریسپانس ٹیمیں (MRTs) اور دیگر ہنگامی امدادی و ریسکیو یونٹس کو تعینات کیا گیا ہے تاکہ موسم یا کسی بھی دیگر ہنگامی صورتحال کی صورت میں فوری امداد فراہم کی جا سکے۔