عظمیٰ نیوزسروس
جموں //جموں کشمیر سے دفعہ 370کے خاتمہ کے بعد تعمیر و ترقی کا نیا سورج طلوع ہونے کا دعویٰ کرتے ہوئے بی جے پی کے قومی جنرل سیکرٹری ترون چُگ نے کہا کہ جموں کشمیر میں دفعہ 370کی منسوخی کے بعد ماحول تبدیل ہوا ۔انہوںنے کہا کہ جموں کشمیر ملک کا تاج ہے اور اس کو تاج کی طرح ہی سجایا جائے گا ۔ جموں کشمیر کی خصوصی پوزیشن کے خاتمہ کے پانچ سال مکمل ہونے پر بی جے پی کے قومی جنرل سکریٹری ترون چُگ نے کہا کہ گزشہ برسوںکے دوران لوگوں نے نئی اور مثبت تبدیلیاں دیکھی ۔ انہوں نے کہا کہ جموںکشمیر کو مکمل طور پر ملک کے ساتھ ضم کرنے کا جو ایجنڈا تھا وہ اگست 2019می ہی مکمل کر لیا گیا اور دفعہ 370جس نے لوگوں میںاونچ نیچ کا فرق رکھا تھا کو ہٹاکر اس مسئلے کو بھی حل کر دیا گیا ۔چُگ نے کہا کہ جموں کشمیر کی خصوصی پوزیشن سے مقامی سیاسی پارٹی نے خاندانی راج قائم کرکے عیش و عشرت کی زندگیاں بسر کر لی تھی اور جموں کشمیرمیںتعمیر و ترقی کے نام پر لوگوں سے استحصال کیا جار ہا تھا ۔چُگ نے کہا کہ وزیر اعظم نریندر مودی نے تاریخی فیصلہ لیکر یہ ثابت کر دیا کہ وہ لوگوں کی بھلائی اور ملک کی تعمیر و ترقی کیلئے وعدہ بند ہے اور اس فیصلہ کو تواریخ میںلکھا جائے گا ۔ انہوں نے کہا کہ جموں کشمیر میں دفعہ 370کی منسوخی کے بعد ماحول تبدیل ہوا ۔انہوں نے کہا کہ ہم جموں کشمیر کے لوگوں کے ساتھ ہیں اور اس بات کیلئے وعدہ بند ہے کہ جموں کشمیر میں تعمیر و ترقی کا نیا دور شروع ہوجس پر پہلے ہی کام شروع کیا گیا ہے ۔ انہوںنے کہا کہ گریز کو ایک نئے سیاحتی مقام کے بطور پیش کیا جا رہا ہے ۔ انہوںنے کہا کہ جموں کشمیر ملک کا تاج ہے اور اس کو تاج کی طرح ہی سجایا جائے گا ۔ انہوںنے کہا کہ پاکستان نے جموں کشمیر میں عسکریت کا بڑھائو دینے کیلئے ہر ممکن کوشش کی تاہم ملک دشمن عناصر اور شدت پسندی کے خلاف سخت کارروائی کے بعد عسکری کارورائیوںمیں نمایاں کمی ریکارڈ کی گئی جبکہ تشدد کے واقعات بھی دفعہ 370کے خاتمہ کے بعد کم ہو گئے ۔
