محمد تسکین
بانہال// مسلسل بارشوں کی وجہ سے بانہال کی بنکوٹ پنچایت کے درمنن گاؤں میں کئی مکانوں کے صحن اور حفاظتی دیواریں ڈھہ جانے کی وجہ سے کم از کم دو رہائشی مکانوں کو خطرہ لاحق ہوا ہے۔ بانہال قصبہ سے قریب اڑھائی کلومیٹر دور بنکوٹ کے درمنن علاقے میں زمین کھسکنے کا یہ واقع ہفتے کی دوپہر پیش آیا جس کی وجہ سے سابقہ پنچ غلام محمد میر ولد غلام رسول مہر اور رئیس احمد میر ولد عبدالرشید میر کے رہائشی مکانات کو خطرہ لاحق ہوگیا ہے اور مزید بارشوں سے مکانوں کی سامنے والی دیواروں کو نکلنے کا خدشہ لاحق ہوگیا ۔مقامی لوگوں نے کشمیر عظمیٰ کو بتایا کہ مکانوں کے صحن میں بڑی بڑی دراڑیں پڑ رہی ہیں اور مسلسل بارشوں کی وجہ سے زمین نکل رہی ہے اور دراڑوں کا یہ سلسلہ مزید وسیع ہو رہا ہے ۔ انہوں نے تحصیل انتظامیہ بانہال سے اس معاملے کی طرف توجہ دینے اور نقصان کا جائزہ لینے کیلئے محکمہ مال کی ایک ٹیم روانہ کرنے کا مطالبہ کیا ہے۔
