کووِڈ متاثرہ بچوں او راہل خانہ کیلئے سکالر شپ اور پنشن سرٹیفکیٹ

سرینگر//لیفٹیننٹ گورنر منوج سِنہا نے کووِڈ ۔19کی وجہ سے متاثرہ بچوں او راہل خانہ کو سکالر شپ اور پنشن سرٹیفکیٹ کی گرانٹ دیتے ہوئے کووِڈ اموات سے متاثرین کیلئے خصوصی اِمدادی سکیم (ایس اے ایس سی ایم ) کا آغاز کیا۔لیفٹیننٹ گورنر نے کہا کہ جموں وکشمیر حکومت اِس وبائی اَمراض میں اَپنے والدین کو کھونے والے بچوں کی مدد کے لئے پُر عزم ہے۔اُنہوں نے کہا کہ پنشن کے علاوہ ہر ممکن کوشش کی جائے گی کہ وہ باوقار زندگی گزاریں اور انہیں کوئی مالی پریشانی نہ ہو۔اُنہوں نے مزید کہا کہ ہمارا فرض اور پوری ذمہ داری ہے کہ ہم اِن کنبوں کی مددکریں ، معاشی بحالی اور ان کی زندگی میں استحکام کو یقینی بنائیں۔لیفٹیننٹ گورنر نے کہا کہ متاثرہ کنبوںکو تفویض کرنے کے لئے محکمہ سوشل ویلفیئر میں ایک خصوصی سیل تشکیل دیا گیا ہے جس میں حکومت کی سرپرستی میں فلاحی منصوبوں کے تحت فوائد کو تلاش کرنے اور ان کی سہولیت فراہم کی جاسکتی ہے۔محکمہ سوشل ویلفیئر کے اَفسران اور تمام ضلع ترقیاتی کمشنران کو ہدایت دی گئی کہ وہ ان کنبوںکی نشاندہی کریں جو کووِڈ کی وجہ سے اَپنے عزیزوں کو کھوچکے ہیں تاکہ ان کو معاشرتی تحفظ اور دیگر ضروری مدد فراہم کی جاسکے۔لیفٹیننٹ گورنر نے ضلعی سماجی بہبود کے اَفسران کو ہدایت دی کہ وہ چوبیس گھنٹے مدد فراہم کرنے کے لئے اَپنے اَپنے علاقوں میں ایسے کنبوں کا باقاعدہ دورہ کریں۔اُنہوں نے کہا کہ وزیر اعظم نریندر مودی نے کورونا سے متاثرہ بچوں کی مدد او ربااِختیار بنانے کے لئے ’’ بچوں کے لئے وزیراعظم کی دیکھ بھال ‘‘ کے نام سے ایک الگ سکیم بھی شروع کی ہے جس سے ہمارے یوٹی کے اہل خانہ کو فائدہ ہوگا۔اُنہوں نے مزید کہا کہ تمام متعلقہ اَفسران کو یہ یقینی بنانا چاہئے کہ تمام متاثرہ کنبوں میں’ وزیر اعظم کی دیکھ بھال‘ سکیم کے فوائد فراہم کئے جائیں۔لیفٹیننٹ گورنر نے محکمہ سوشل ویلفیئر کی کوششوں کو بھی سراہا جس نے سکالر شپ او رپنشنری سپورٹ کے لئے 512 سے زیادہ مستفید اَفراد کی نشاندہی کی اور اِس سکیم کے تحت جلد از جلد صد فیصدہدف حاصل کرنے کے لئے کہا۔ادھرلیفٹیننٹ گورنر منوج سنہا نے کہا ہے کہ حکومت آن لائن عوامی تقسیم کے نظام پر کام کرنے والی 6738 راشن شاپس کے نیٹ ورک کے ذریعے راشن کے حامل ایک کروڑ لوگوں تک پہنچ رہی ہے،جس میں 25.73 لاکھ راشن کارڈ ہولڈرز شامل ہیں۔۔ انہوں نے اس بات پر زور دیا کہ کوویڈ 19 کی صورتحال کی وجہ سے غریب اور نادار افراد کو درپیش مشکلات کے خاتمے کے لئے پردھان منتری غریب کلیان انا یوجنا (پی ایم جی کے) کے تحت بغیر کسی قیمت کے اضافی مفت اناج کی تقسیم کو یقینی بنایا جائے۔گورنر منوج سنہا نے سول سیکریٹریٹ میں ، ریاست جموں و کشمیر کے مرکزی علاقہ میں عوامی تقسیم کے نظام کا جائزہ لینے کے لئے منعقدہ اجلاس کے دوران پبلک ڈسٹری بیوشن سسٹم کے تحت محکمہ فوڈ ، سول سپلائی اینڈ کنزیومر افیئرز (ایف سی ایس اور سی اے) کی کارکردگی اور مستقبل کے اہداف کا جائزہ لیا۔سبسڈی اور سستی قیمتوں پر معیاری اشیائے خوردونوش کی دستیابی کو معقول بنانے کے علاوہ تقسیم سلسلہ کو آسان بنانے پر زور دیتے ہوئے ، لیفٹیننٹ گورنر نے متعلقہ عہدیداروں کو ہدایت کی کہ وہ نظام کو مزید مضبوط بنانے کے لئے پالیسی منصوبہ بندی کی سطح پر اصلاحات لائیں۔