عظمیٰ نیوز سروس
سرینگر// جموں و کشمیر کے محکمہ خزانہ نے پنشنرز اور فیملی پنشنرز کی طرف سے لائف سرٹیفکیٹ یا ڈیجیٹل لائف سرٹیفکیٹ جمع کرانے کی آخری تاریخ کو، 15 دسمبر تک بڑھا دیا ہے اور اسے سالانہ ضرورت کو پورا کرنے کا آخری موقع قرار دیا ہے۔ٹریجری کوڈ کے تحت، بینکوں اور ٹریجریز کے ذریعے فوائد حاصل کرنے والے تمام پنشنرز کو ہر نومبر میں اپنا لائف سرٹیفکیٹ جمع کرانا چاہیے تاکہ پنشن کی بلا تعطل ادائیگی اور مستفید ہونے والوں کی تصدیق کو یقینی بنایا جا سکے۔اس سال اس عمل کو آسان بنانے کے لیے، محکمہ خزانہ نے جموں اور کشمیر بینک لمیٹڈ کے ساتھ مل کر ڈیجیٹل لائف سرٹیفکیٹس تیار کرنے کے لیے ایک خصوصی مہم شروع کی۔ حکام نے بتایا کہ جموں و کشمیر میں تقریباً 2.5 لاکھ پنشنرز میں سے تقریباً 1.80 لاکھ نے پہلے ہی جسمانی یا ڈیجیٹل طور پر اپنے سرٹیفکیٹ جمع کرائے ہیں۔تاہم، تقریباً 70,000 پنشنرز نے ابھی رسمی کارروائیاں مکمل کرنا ہیں، جس کی وجہ سے وہ 25 نومبر کے بعد سے پنشن حاصل کرنے کے لیے نااہل ہو سکتے ہیں اگر وہ تعمیل کرنے میں ناکام رہتے ہیں۔اب محکمے نے آخری تاریخ میں 15سے 25 دسمبر تک توسیع کر دی ہے، واضح انتباہ کے ساتھ کہ مزید کوئی رعایت نہیں دی جائے گی۔ پنشنرز اور فیملی پنشنرز کو مشورہ دیا گیا ہے کہ وہ اپنا لائف سرٹیفکیٹ، ترجیحا ڈیجیٹل موڈ میں، آخری تاریخ سے پہلے اپنے متعلقہ بینک یا ٹریجری میں جمع کرائیں۔
