عظمیٰ نیوز سروس
جموں// لیفٹیننٹ گورنر منوج سنہا نے اتوار کو شہریوں سے انسانی اعضا عطیہ کرنے کا عہد کرنے کی اپیل کی اور کہا کہ تمام عقائد میں زندگی کے تحفے کا احترام کیا جاتا ہے۔انہوں نے کہا”میں آج ہر شہری سے اعضا کے عطیہ کا عہد لینے کی اپیل کرتا ہوں، معاشرے کو یاد رکھنا چاہیے کہ ہم میں سے ہر ایک ممکنہ عطیہ دہندہ ہے ،اور ہم میں سے ہر ایک کے پاس اس دنیا سے جانے کے بعد بھی جان بچانے کی غیر معمولی طاقت ہے،” ۔سنہا نے ‘نمن دیوس’ میں شرکت کرتے ہوئے کہا کہ اعضا عطیہ کرنے والوں اور ان کے خاندانوں نے بے شمار زندگیوں میں خوشیاں لائی ہیں۔سٹیٹ آرگن اینڈ ٹشو ٹرانسپلانٹ آرگنائزیشن (SOTTO) جموں و کشمیر کے کردار کی تعریف کرتے ہوئے، انہوں نے اس کے نمائندوں پر زور دیا کہ وہ سوشل نیٹ ورکس، کمیونٹی میٹنگز، تعلیمی اداروں، عبادت گاہوں اور کام کی جگہوں سمیت تمام پلیٹ فارمز پر بیداری مہم کو تیز کریں۔سنہا نے کہا”جو لوگ ثقافتی یا مذہبی خدشات کی وجہ سے ہچکچاتے ہیں، میں آپ کو یاد دلانا چاہتا ہوں کہ ہماری روایات زندگی کے تقدس اور بے لوث دینے کی فضیلت کی تصدیق کرتی ہیں، کسی بھی روحانی رہنما، خاندان کے افراد اور کمیونٹی کے بزرگوں سے بات کریں اور آپ دیکھیں گے کہ زندگی کے اس تحفے کا نہ صرف تمام عقائد میں احترام کیا جاتا ہے بلکہ اسے ایک نعمت کے طور پر منایا جاتا ہے،” ۔ انہوں نے مزید کہا کہ ایک شخص آرام سے عطیہ کر سکتا ہے۔انہوں نے کہا، مجھے بڑی ذمہ داری کے ساتھ اس بات پر زور دینا چاہیے کہ حکومت یا کسی بھی ادارے کی طرف سے کوئی بھی ایوارڈ آپ کے تحفے کی قیمت نہیں ہو سکتا۔ایل جی نے مزید کہا کہ SOTTO جموں و کشمیر اپنی مہموں، ہسپتال کی شراکت داری، این جی اوز کے ساتھ تعاون اور عطیہ دہندگان کے معاملات کو حساس طریقے سے شناخت کرنے اور ان کا انتظام کرنے کے لیے طبی پیشہ ور افراد کی تربیت کے ذریعے ہمدردی اور انسانیت کی تحریک بن گیا ہے۔انہوں نے اپنی ریاستی ٹیم پر زور دیا کہ وہ بات چیت اور آٹ ریچ کے ذریعے رجسٹریشن اور وعدوں کو بڑھائے۔ایل جی نے گزشتہ سال خود کو مرکزی وزارت صحت اور خاندانی بہبود کی آیوشمان بھارت آرگن ڈونیشن رجسٹری میں رجسٹر کیا تھا۔
