ادھم پور میں مسافر بس پہاڑی سے نیچے گری

۔ 56سے زیادہ زخمی،مہلوکین میں7خواتین شامل، گاڑی آٹو رکشہ سے ٹکرانے سے 7کو چوٹیں آئیں

محمد تسکین

بانہال// جموں و کشمیر کے ادھم پور ضلع میں پیر کو ایک مسافر بس پہاڑی سے نیچے جاگری، جس کے نتیجے میں 21 افراد ہلاک اور 30 دیگر زخمی ہو گئے۔نیچے سڑک پرگرنے سے پہلے بس نے ایک آٹو رکشہ کو کچل دیا۔ جس کے نتیجے میں 7افراد کو چوٹیں آئیں تاہم وہ بال بال بچ گئے۔پہاڑی راستے سے گزرنے والے ایک فوجی قافلے نے بچا ئوآپریشن کی قیادت کی جب صبح 10 بجے کے قریب رام نگر علاقے میں پہاڑی کی گورٹ گائوں کے قریب پرائیویٹ بس کے ڈرائیور کا کنٹرول کھو بیٹھا۔بس میں 65 مسافر سوار تھے، جن میں زیادہ تر وہ لوگ تھے جو اپنے روزمرہ کے کام پر رام نگر سے ادھم پور جا رہے تھے۔ریسکیو آپریشن انتہائی چیلنجنگ ثابت ہوا کیونکہ گاڑی گر کر لوہے کا ڈھیر بن گئی تھی اور اس کا اوپر والا حصہ تقریباً مکمل طور پرتباہ ہو چکا تھا۔پولیس نے بتایا”رام نگر سے ادھم پور جانے والی ایک بس پہاڑی راستے پر کنٹرول کھو بیٹھی اور ڈھلوان سے نیچے جاگری، اور نیچے سڑک پر الٹا اترنے پر ایک آٹو رکشہ کو کچل دیا۔ 17 مسافر جائے وقوعہ پر مردہ پائے گئے، جب کہ چار دیگر بعد میں ہسپتال میں زخموں کی تاب نہ لاتے ہوئے چل بسے”۔

عہدیداروں نے بتایا کہ2اور شدید زخمی افراد نے علاج کے دوران اودھم پور ضلع ہسپتال میں زخموں کی تاب نہ لاتے ہوئے دم توڑ دیا جس سے مرنے والوں کی تعداد بڑھ کر 21 ہوگئی۔انہوںنے کہا کہ مقامی باشندوں نے بچا ئوکے دوران اہم مدد کی۔ پولیس کی ٹیمیں بشمول سینئر سپرنٹنڈنٹ آف پولیس، ایس ایچ او رام نگر اور دیگر افسران موقع پر پہنچ گئے۔فوج کے جوانوں نے بھی مدد کی، اور مشترکہ ریسکیو آپریشن کیا گیا۔ پولیس کے ڈی آئی جی نے کہا کہ بعد میں ہائیڈرولک کرین کا استعمال کرتے ہوئے تباہ شدہ گاڑی کو اوپر لایا گیا۔ انہوں نے کہا کہ یہ ایک انتہائی افسوسناک واقعہ ہے۔ انہوںنے کہا کہ پولیس کے ڈائریکٹر جنرل نلین پربھات اور جموں زون کے انسپکٹر جنرل آف پولیس بھیم سین ٹوٹی فون پر صورتحال کی نگرانی کر رہے ہیں۔ فوج نے کہا کہ وہ اودھم پور سے رام نگر کی طرف جا رہے تھے، اور گاڑی کو پہاڑی سے نیچے گرتے ہوئے دیکھتے ہی فورا ًحرکت میں آگئے۔فوج نے بتایا کہ ” گاڑی تقریباً 100 میٹر کی بلندی سے گر گئی، ہم نے ریسکیو آپریشن شروع کیا، اس طرح بہت سی قیمتی جانیں بچائی گئیں جن میں مردوں اور عورتوں کی بڑی مشکل سے جانیں بھی شامل تھیں۔”

بلال میڈیکل آفیسر سب ڈسٹرکٹ ہسپتال رام نگر نے کہا کہ ہسپتال میں کل 17لاشیں لائی گئیں جو موقعہ پر ہی ہلاک ہوئے تھے۔انہوں نے مزید کہا کہ اسکے علاوہ دیگر43افراد کو زخمی حالت میں لایا گیا جن میں سے ایک شدید زخمی کو جموں میڈیکل کالج ریفر کیا گیا جبکہ 17زخمیوں کو ادہم پورہ ضلع ہسپتال منتقل کیا گیاجبکہ دیگر 17کو علاج معالجہ کرانے کے بعد رخصت کیا گیا۔میڈیکل سپر انٹنڈنٹ ادہم پور ڈاکٹر گپتا نے بتایا کہ انکے پاس کل 49زخمیوں کو لایا گیا جن میں سے 4کی موت واقع ہوئی۔ فوج کا کہنا ہے کہ اس حادثہ میں بس سمیت آٹو رکشہ میں مجموعی طور 78افراد زخمی ہوئے ۔ انہوں نے کہا کہ 21کی موت واقع ہوئی جبکہ 57افراد زخمی ہوئے۔برنو رام نگر گائوں کے 4افراد، سنیتر گائوں کے 4، امروہ گائوں کے 3، کرموہ گائوں کے 2، اور کٹ والٹ کے 2مسافر مرنے والوں میں شامل ہیں۔ مرنے والی 6خواتین میں گیتا دیوی،شاردا دیوی،وشالی دیوی،گلابو دیوی، کانتا دیوی اور انیتا دیوی شامل ہیں۔

پسماندگان کو فی کس 2لاکھ روپے دینے کا اعلان
صدر، وزیر اعظم اور وزیر داخلہ کاظہار افسوس

عظمیٰ نیوز سروس

نئی دہلی//صدر جمہوریہ دروپدمرمو نے X پر ایک پوسٹ میں کہا، ” بس حادثے میں کئی لوگوں کی موت کے بارے میں جان کر مجھے بہت دکھ ہوا ہے، میں اس سانحہ میں اپنی جانیں گنوانے والوں کے خاندانوں کے تئیں اپنی تعزیت کا اظہار کرتی ہوں، زخمیوں کی جلد صحت یابی کی دعا کرتی ہوں”۔ادھر وزیر اعظم نریندر مودی نے حادثے میں جانوں کے ضیاع پر دکھ کا اظہار کیا اور ہلاک ہونے والوں کے لواحقین کے لیے 2 لاکھ روپے اور زخمیوں کے لیے 50 ہزارروپے دینے کا اعلان کیا۔

مودی نے ایکس پر ایک پوسٹ میں کہا، “میں زخمیوں کی جلد صحت یابی کے لیے دعا کرتا ہوں۔ 2 لاکھ روپے کی ایکس گریشیا المناک حادثے میں جان گنوانے والوں میں سے ہر ایک کے لواحقین کو دی جائے گی، زخمیوں کو 50,000 روپے دیئے جائیں گے۔”وزیر داخلہ امیت شاہ نے بھی جانی نقصان پر افسوس کا اظہار کیا۔مرکزی وزیر داخلہ نے ایکس پر پوسٹ ایک پیغام میں کہا کہ ادھم پور میں سڑک حادثہ انتہائی افسوسناک ہے۔انہوں نے کہا کہ “میں اس حادثے میں اپنی جانوں سے ہاتھ دھو بیٹھنے والوں کے خاندانوں سے اپنی گہری تعزیت کا اظہار کرتا ہوں۔ مقامی انتظامیہ راحت اور بچا ئوکے کاموں میں پوری تیزی کے ساتھ مصروف ہے۔ میں زخمیوں کی جلد صحت یابی کے لیے دعا گو ہوں۔”

لاپرواہی پائی گئی، تو کارروائی ہوگی
وزیر اعلیٰ کاایکس گریشیا ریلیف کا اعلان،ایل جی کا اظہارِ تعزیت

عظمیٰ نیوز سروس

سرینگر//لیفٹیننٹ گورنر نے کہا کہ ادھم پور میں ہونے والا المناک سڑک حادثہ دل دہلا دینے والا ہے۔ایکس پر ایک پوسٹ میں، انہوں نے کہا کہ سوگوار خاندانوں کے تئیں میری گہری تعزیت ہے۔ خدا انہیں طاقت عطا فرمائے، زخمیوں کی جلد صحت یابی کی دعا۔” سنہا نے کہا کہ انہوں نے ضلع انتظامیہ، پولیس، سٹیٹ ڈیزاسٹر ریسپانس فنڈ اور محکمہ صحت کو ہدایت دی کہ وہ متاثرہ افراد کو ہر ممکن مدد فراہم کریں۔

ادھروزیراعلیٰ نے سوگوار خاندانوں سے دلی تعزیت کا اظہار کیا اور زخمیوں کی جلد صحت یابی کی دعا کی۔ عمر عبداللہ نے کہا کہ قیمتی جانوں کا ضیاع انتہائی تکلیف دہ ہے۔ انہوں نے کہا کہ حادثے کی اصل وجہ معلوم کی جائے گی اور اگر کوئی غفلت پائی گئی تو سختی سے نمٹا جائے گا۔عمر نے مزید کہا، “ہم یہ معلوم کریں گے کہ یہ حادثہ کیسے ہوا اور کہاں کوئی کوتاہی ہوئی، اگر حکومت کی طرف سے کسی کارروائی کی ضرورت پڑی تو ہم اسے ضرور لیں گے۔” وزیر اعلی نے حادثے کے متاثرین کے لیے ایکس گریشیا ریلیف کا اعلان کرتے ہوئے کہا کہہر مرنے والے کے لواحقین کو 2 لاکھ، شدید زخمیوں کو 1 لاکھ، اور حادثے میں معمولی زخمی ہونے والوں کو 25,000 کی ایکس گریشیا فراہم کی جائے گی۔