کشمیر میں رک رک کر بارشوں کا سلسلہ جاری، گلمرگ میں تازہ برف باری

عظمیٰ ویب ڈیسک
سری نگر/محکمہ موسمیات کی پیش گوئی کے عین مطابق سری نگر سمیت وادی کشمیر کے میدانی علاقوں میں گذشتہ چار دنوں سے رک رک کر بارشوں کا سلسلہ جاری ہے جبکہ سیاحتی مقام گلمرگ سمیت کچھ پہاڑی علاقوں میں گذشتہ چوبیس گھنٹوں کے دوران تازہ برف باری ہوئی ہے۔
متعلقہ محکمے کے ایک ترجمان کے مطابق وادی میں رواں ہفتے کے اختتام تک موسم کی یہی صورتحال جاری رہنے کا امکان ہے۔دریں اثنا سری نگر میں گذشتہ چوبیس گھنٹوں کے دوران 10.6 ملی میٹر بارش ریکارڈ ہوئی ہے جبکہ سر حدی ضلع کپوارہ میں اس دوران 9.1 ملی میٹر بارش ریکارڈ ہوئی ہے۔
وادی کے شہرہ آفاق سیاحتی مقام گلمرگ میں گذشتہ چوبیس گھنٹوں کے دوران 5.6 ملی میٹر بارش ریکارڈ ہوئی ہے جبکہ وادی کے دوسرے مشہور سیاحتی مقام پہلگام میں اس دوران5.8 ملی میٹر بارش ریکارڈ ہوئی ہے۔
متعلقہ محکمے کے مطابق وادی میں خراب موسمی صورتحال کا سلسلہ 16 مارچ تک جاری رہنے کا امکان ہے۔انہوں نے بتایا کہ 13 اور 14 مارچ کو وادی میں کئی مقامات پر ہلکی برف باری یا بارشیں متوقع ہیں جبکہ 15 اور 16 مارچ کو بھی کئی مقامات پر رک رک کر ہلکی سے درمیانی درجے کی برف باری یا بارشوں کا امکان ہے۔
انہوں نے کہا کہ بعد ازاں وادی میں 17 سے 21 مارچ تک موسم عام طور پر خشک رہنے کی توقع ہے۔
محکمے نے اپنی ایڈوائزری میں سیاحوں، مسافروں اور ٹرانسپورٹروں سے ٹریفک ایڈوائزری پر عمل کرنے کو کہا ہے جبکہ کسانوں سے کہا گیا ہے کہ وہ 10 سے 18 مارچ تک اپنے کھیت کھلیانوں اور باغوں میں آپریشنز معطل رکھنے کی صلاح دی ہے۔
علاوہ ازیں لوگوں سے ان علاقوں جہاں برفانی تودے گر آنے کے خطرات رہتے ہیں، میں جانے سے احتراز کرنے کی اپیل کی ہے۔ادھر وادی کے کئی مقامات پر شبانہ درجہ حرارت 2 سے 3 ڈگری سینٹی گریڈ معمول سے زیادہ ریکارڈ ہوا ہے۔
گرمائی دار الحکومت سری نگر میں کم سے کم درجہ حرارت7.0 ڈگری سینٹی گریڈ ریکارڈ کیا گیا جو معمول سے3.3 ڈگری سینٹی گریڈ زیادہ ریکارڈ ہوا تھا۔
شمالی کشمیر میں واقع سیاحتی مقام گلمرگ وادی کا سرد ترین علاقہ رہا ہے جہاں شبانہ درجہ حرارت منفی0.8 ڈگری سینٹی گریڈ ریکارڈ کیا گیا جو معمول سے2.5 ڈگری سینٹی گریڈ زیادہ ریکارڈ ہوا تھا۔
وادی کے دوسرے مشہور سیاحتی مقام پہلگام میں کم سے کم درجہ حرارت2.5 ڈگری سینٹی گریڈ جبکہ کو کرناگ میں شبانہ درجہ حرارت5.4 ڈگری سینٹی گریڈ ریکارڈ کیا گیا۔