سرینگر// سرینگر پولیس نے ایک ایسے شخص کو گرفتار کر لیا ہے جو خود کو سرکاری افسر ظاہر کر کے ایک خاتون سے اس کے شوہر کی رہائی کا جھانسہ دے کر رقم بٹورنے میں ملوث تھا۔
پولیس ترجمان نے بتایا کل ملزم صادق حسن چھالو ساکن شہید گنج کو صفیہ ریاض کی شکایت پر 6 جنوری 2025 کو گرفتار کیا گیا۔ صفیہ نے الزام لگایا کہ ملزم نے خود کو سرکاری افسر کے طور پر پیش کیا اور ان سے 2 لاکھ روپے مانگے تاکہ ان کے شوہر ریاض احمد کی رہائی میں مدد کی جا سکے۔ ریاض احمد کو پولیس سٹیشن راج باغ نے 19 نومبر 2024 کو PIT NDPS ایکٹ کے تحت گرفتار کیا تھا۔
شکایت میں مزید بتایا گیا کہ ملزم نے رقم تو لے لی مگر وعدے کے مطابق مدد فراہم نہیں کی۔ جب صفیہ نے اپنی رقم واپس مانگی تو ملزم نے کچھ رقم واپس کی لیکن باقی دینے سے انکار کر دیا۔
ترجمان نے بتایا کہ پولیس نے شکایت ملتے ہی فوری کارروائی کی اور قانون کی متعلقہ دفعات کے تحت مقدمہ درج کر کے ملزم کو حراست میں لے لیا۔
ریاض احمد چھنا، جو کہ شکایت کنندہ کے شوہر ہیں، اس وقت سب جیل بھدرواہ میں قید ہیں۔
سرینگر پولیس نے عوام کو متنبہ کیا ہے کہ وہ ایسے دھوکہ بازوں سے محتاط رہیں اور ان افراد پر اعتماد نہ کریں جو قانون نافذ کرنے والے اداروں پر اثر و رسوخ رکھنے کا جھوٹا دعویٰ کرتے ہیں۔
پولیس نے شہریوں کو ہدایت دی ہے کہ ایسے کسی بھی واقعے کی فوری اطلاع قریبی پولیس سٹیشن یا ہیلپ لائن نمبر 112 پر دیں۔
