پاکستان سے صرف پی او کے پر بات ہوگی، ہر دھمکی کا منہ توڑ جواب دیا جائے گا: راجناتھ سنگھ

عظمیٰ ویب ڈیسک
درّاس/ وزیر دفاع راجناتھ سنگھ نے اتوار کو واضح کیا کہ پاکستان کے ساتھ مستقبل میں اگر کوئی بات چیت ہوگی تو وہ صرف پاکستان کے زیرِ انتظام کشمیر (پی او کے) کے مسئلے پر ہوگی۔
کرگل وجے دیوس کے موقع پر درّاس میں واقع کرگل وار میموریل میں منعقدہ تقریب سے خطاب کرتے ہوئے راج ناتھ سنگھ نے کہا کہ پاکستان کے زیرِ انتظام کشمیر بھارت کا اٹوٹ حصہ ہے جو پاکستان کے غیر قانونی قبضے میں ہے، لہٰذا مستقبل میں پاکستان سے صرف اسی معاملے پر گفتگو کی جائے گی۔
انہوں نے الزام عائد کیا کہ پاکستان نے دہشت گردی کو اپنی ریاستی پالیسی کا حصہ بنا لیا ہے اور وہاں کی فوجی اسٹیبلشمنٹ اور دہشت گرد تنظیموں کے درمیان کوئی فرق باقی نہیں رہا۔
وزیر دفاع نے کہا کہ بھارتی فوج نے “آپریشن سندور” کے ذریعے دہشت گردوں اور ان کے سرپرستوں کو سخت جواب دیا اور یہ ثابت کیا کہ بھارت ہر قسم کی جارحیت کا اس سے بھی زیادہ سخت جواب دینے کی صلاحیت رکھتا ہے۔
انہوں نے کہا، “بھارت کی خودمختاری کو چیلنج کرنے یا دھمکی دینے کی ہر کوشش کا ہماری مسلح افواج بھرپور اور منہ توڑ جواب دیں گی۔”
راج ناتھ سنگھ نے 1999 کی کرگل جنگ میں جان کا نذرانہ پیش کرنے والے فوجیوں کو خراجِ عقیدت پیش کرتے ہوئے کہا کہ یہ جنگ صرف فوجی یا سفارتی کامیابی نہیں تھی بلکہ اس نے پوری دنیا کے سامنے بھارتی فوجیوں کی بہادری، عزم اور عظیم قربانی کو اجاگر کیا۔
انہوں نے کہا کہ کرگل وار میموریل پر کندہ شہداء کے نام بھارت کے ہر خطے، ہر مذہب اور ہر طبقے کی نمائندگی کرتے ہیں، جو قومی اتحاد کی علامت ہیں اور ان عناصر کے لیے واضح پیغام ہیں جو ملک کو تقسیم کرنے کی کوشش کرتے ہیں۔
بھارت اور پاکستان کا تقابل کرتے ہوئے راج ناتھ سنگھ نے کہا کہ بھارت جدت، ٹیکنالوجی، کاروباری سرگرمیوں، خلائی تحقیق اور ڈیجیٹل ترقی کی راہ پر گامزن ہے، جبکہ پاکستان دہشت گردی، انتہا پسندی اور سرحد پار دراندازی کو فروغ دے رہا ہے۔
انہوں نے کہا، “بھارت سیمی کنڈکٹرز، اسٹارٹ اپس، سیٹلائٹس اور ڈیجیٹل انفراسٹرکچر تعمیر کر رہا ہے، جبکہ پاکستان دہشت گردی اور پراکسی جنگ کو پروان چڑھا رہا ہے۔” انہوں نے مزید کہا کہ بھارتی مسلح افواج ہر قسم کے دشمنانہ عزائم کا مقابلہ کرنے کے لیے مکمل طور پر تیار ہیں۔
کرگل جنگ کی قربانیوں کو یاد کرتے ہوئے وزیر دفاع نے کہا کہ اس جنگ میں شہید ہونے والے متعدد فوجی بیس سے پچیس برس کی عمر کے نوجوان تھے، جنہوں نے اپنے خوابوں اور خواہشات کو وطن کی خاطر قربان کر دیا۔ انہوں نے شہداء کے اہلِ خانہ، خصوصاً ماؤں، بیویوں اور بچوں کی قربانیوں اور صبر کو بھی خراجِ تحسین پیش کیا۔
کرگل وجے دیوس کے موقع پر راج ناتھ سنگھ نے بھارت کی خودمختاری اور علاقائی سالمیت کے تحفظ کے لیے جانوں کا نذرانہ پیش کرنے والے تمام شہداء کو خراجِ عقیدت پیش کرتے ہوئے کہا کہ ان کی بہادری اور قربانیاں آنے والی نسلوں کے لیے ہمیشہ مشعلِ راہ رہیں گی۔