سرینگر// وزیر اعظم نریندر مودی نے ہفتے کی شام کو کہا کہ سونہ مرگ میں زڈ مورہ ٹنل کا افتتاح کرنے کے لئے دورے کا بے صبری سے انتظار کررہا ہوں۔
انہوں نے کہا کہ اس ٹنل کی وجہ سے شعبہ سیاحت اور مقامی معیشت کو بھی فروغ مل پائے گا۔
بتادیں کہ وزیر اعظم نریندر مودی 13 جنوری کو گگن گیر سونہ مرگ میں 2717 کروڑ روپے کی لاگت سے تیار زڈ مورہ ٹنل کا افتتاح کریں گے۔
اطلاعات کے مطابق، وزیر اعظم نریندر مودی کا کہنا ہے کہ جموں و کشمیر کے سونہ مرگ میں زیڈ موڑ ٹنل کا افتتاح کرنے کیلئے بے صبری کے ساتھ انتظار کر رہا ہوں۔
انہوں نے وزیر اعلیٰ عمر عبداللہ سے مخاطب ہوتے ہوئے کہا، ’ آپ نے اس ٹنل سے شعبہ سیاحت اور مقامی معیشت کو پہنچنے والے فائدے کی اچھی نشاندہی کی ہے‘۔
وزیر اعظم نے کہا کہ فضائی تصاویر اور ویڈیوز کو بہت پسند کیا۔
واضح رہے کہ وزیر اعلیٰ عمر عبداللہ نے وزیر اعظم دورے کے حوالے سے کی جارہی تیاریوں کا آج گگن گیر سونہ مرگ میں جائزہ لیا اور وہاں پر پولیس اور صوبائی انتظامیہ کے آفیسران کے ساتھ میٹنگ بھی کی۔
وزیر اعلیٰ عمر عبداللہ نے جوں ہی اپنے آفیشل ایکس اکاونٹ پر دورے کی تصاویر شیئر کی تو وزیر اعظم نریندر مودی نے بھی اس کے جواب میں لکھا کہ ’سونہ مرگ میں زیڈ موڑ ٹنل کا افتتاح کرنے کے لئے دورے کا بے صبری سے انتظار کررہا ہوں‘۔
واضح رہے کہ وزیر اعظم کے دورے کشمیر کے پیش نظر سونہ مرگ اور گگن گیر کو فوجی چھاونی میں تبدیل کیا گیا ہے۔
گگن گیر کے اوپری پہاڑی علاقوں میں بھی این ایس جی کمانڈوز کے ساتھ ساتھ فوج کی تعیناتی عمل میں لائی گئی ہے۔
سونہ مرگ، گگن گیر اور کنگن تک 20 کلومیٹر حدود علاقے کو سیکورٹی فورسز نے پوری طرح سے سیل کیا ہے اور ٹنل کے نزدیک کسی بھی عام شہری کو جانے کی اجازت نہیں دی جارہی ہیں۔
