دہشت گردی کے ہمدردوں کے خلاف مہم جاری رہے گی: دلباغ سنگھ

جموں//اس بات پر زور دیتے ہوئے کہ دہشت گردی کے ہمدردوں کی شناخت کا عمل جاری ہے، جموں و کشمیر پولیس کے ڈائریکٹر جنرل (ڈی جی پی) دلباغ سنگھ نے پیر کو کہا کہ جموں میں دہشت گردی کو کسی بھی قسم کی مدد فراہم کرنے والے لوگوں یا اداروں کے خلاف مہم جاری ہے۔
ڈی جی پی کٹھوعہ میں سپورٹس اسٹیڈیم میں 11ویں پولیس شہداء میموریل T-20 کرکٹ چیمپئن شپ-2022 کے افتتاح کے بعد میڈیا سے بات کر رہے تھے۔
انہوں نے کہا کہ امن کے دشمن اور دہشت گردی کے حامیوں نے اثاثے بنائے اور عمارتیں تعمیر کیں جو دہشت گردی کو زندہ رکھنے کا کام کرتی ہیں۔ لہذا، ہم دہشت گردوں کے ساتھ روابط رکھنے والے اداروں یا افراد کی ایک ایک کرکے شناخت کرنے کے عمل میں ہیں اور انہیں قانون کے تحت سخت کارروائی کا سامنا کرنا پڑے گا۔
ڈی جی پی جیش محمد کے کمانڈر عاشق حسین نینگرو کے گھر کی مسماری سے متعلق سوال کا جواب دے رہے تھے۔ یاد رپے کہ حال ہی میں پلوامہ کے راج پورہ میں عاشق کے دو منزلہ مکان کو حکام نے منہدم کر دیا تھا۔
ڈی جی پی نے کہا،”یہ مہم اسی عمل کا حصہ تھی جو مستقبل میں بھی جاری رہے گی۔ کوئی بھی جگہ یا کوئی بھی چیز جو دہشت گردی کو فروغ دیتی ہے قانون کے دائرہ اختیار میں آتی ہے یعنی اسے ضبط کرنا/ سیل کرنا یا اسے گرانا اگر حکومت کے دیگر اصولوں کی خلاف ورزی کرنا اس مہم کا حصہ ہے اور یہ مہم دہشت گردی کے حامیوں کے خلاف مستقبل میں بھی جاری رہے گی۔
انہوں نے کہا کہ گزشتہ 30 سالوں میں جموں و کشمیر میں دہشت گردی نے تباہی مچائی ہے۔ جس کا اب خاتمہ کیا جا رہا ہے۔