یو اے پی اے کیس: سرینگر میں دو رہائش گاہوں پر سی آئی کے کے بیک وقت چھاپے

عظمیٰ ویب ڈیسک
سرینگر/جموں و کشمیر کی کاؤنٹر انٹیلی جنس کشمیر (سی آئی کے) نے بدھ کے روز سرینگر میں دو رہائشی مکانات پر بیک وقت تلاشی کارروائیاں انجام دیں۔ یہ کارروائیاں بھارتی تعزیراتِ ہند (آئی پی سی) اور غیر قانونی سرگرمیوں کی روک تھام ایکٹ (یو اے پی اے) کے تحت درج ایک مقدمے کی تحقیقات کے سلسلے میں کی گئیں۔
سرکاری ذرائع نے بتایا کہ پہلی تلاشی باغِ مہتاب میں عبدالجبار بٹ کے بیٹے الطاف احمد بٹ کی رہائش گاہ پر لی گئی، جو سال 1990 سے پاکستان میں مقیم ہیں۔اسی دوران سی آئی کے کی ایک اور ٹیم نے نوگام کے شیخ العالم کالونی میں محمد یاسین بابا کے بیٹے مختار احمد بابا کی رہائش گاہ پر بھی تلاشی کارروائی انجام دی۔ حکام کے مطابق مختار احمد بابا سال 2022 سے پاکستان میں مقیم ہیں۔
ذرائع کے مطابق یہ دونوں کارروائیاں پولیس اسٹیشن سی آئی کے سرینگر میں درج ایف آئی آر نمبر04/2026کے سلسلے میں عمل میں لائی گئیں، جو بھارتی تعزیراتِ ہند کی دفعات 505اور 153A کے علاوہ غیر قانونی سرگرمیوں کی روک تھام ایکٹ (یو اے پی اے) کی دفعات 13 اور 18 کے تحت درج ہے۔حکام کا کہنا ہے کہ تحقیقات جاری ہیں اور جیسے ہی مزید تفصیلات سامنے آئیں گی، انہیں عوام کے ساتھ شیئر کیا جائے گا۔