عظمیٰ نیوز سروس
سرینگر//وزیر اعلیٰ عمر عبداللہ نے کل یہاں سول سیکرٹریٹ میں متعدد عوامی وفود سے ملاقات کی اور اْن کے مسائل اور مطالبات کو بغور سْنا اور انہیں یقین دِلایا کہ تمام جائز معاملات کا باریک بینی سے جائزہ لے کر مناسب کارروائی عمل میں لائی جائے گی۔صدربیٹ مینوفیکچررس ایسوسی ایشن کشمیر فیاض احمد ڈار کی قیادت میں ایک وفد نے وزیر اعلیٰ سے ملاقات کی اور کشمیر میںکرکٹ بیٹ مینو فیکچرنگ اِنڈسٹری کے لئے حکومتی تعاون کی درخواست کی۔وفد نے اس صنعت کو درپیش مختلف مسائل سے وزیر اعلیٰ کو آگاہ کرتے ہوئے اس کے فروغ اور دیرپا ترقی کے لئے مؤثر اقدامات کی درخواست کی۔اِسی طرح صدرسری نگراِنٹرنیشنل ایئرپورٹ ٹیکسی سٹینڈ ڈرائیورز یونین ریاض ٹھاکر کی قیادت میں ایک وفد نے وزیر اعلیٰ سے ملاقات کی اور سری نگر بین الاقوامی ہوائی اڈے پر ٹیکسی آپریٹروں کو درپیش مسائل سے انہیں آگاہ کیا۔
بعدمیں صدر ہاٹ مکس پلانٹ اونرس ایسوسی ایشن کشمیر بشیر احمد خان کی قیادت میں ایک وفد نے بھی وزیر اعلیٰ سے ملاقات کی اور ایسوسی ایشن کو درپیش چیلنجوں پر تفصیلی تبادلہ خیال کیا۔اِنڈسٹریل سٹیٹ پانپورکے ایک وفد بھی وزیر اعلیٰ سے ملاقی ہوا اور اِنڈسٹریل سٹیٹ سے متعلق مختلف مسائل وزیر اعلیٰ کو گوش گزار کئے۔وزیر اعلیٰ عمر عبداللہ نے تمام وفود کے مسائل اور مطالبات کوبغور سْنا اور یقین دِلایا کہ ان کی حقیقی شکایات اور مطالبات کا ہمدردی سے جائزہ لے کر متعلقہ محکموں کے ساتھ مشاورت سے مناسب حل نکالا جائے گا۔ آئی سی آئی سی آئی بینک کے ایک وفد نے بھی وزیر اعلیٰ سے ملاقات کی اور جموں و کشمیر میں کارپوریٹ سوشل ریسپانسبلٹی (سی ایس آر) اقدامات کو مضبوط بنانے اور مالی شمولیت کو وسعت دینے کے طریقوں پر تبادلہ خیال کیا۔
