عظمیٰ نیوز سروس
نئی دہلی //ہندوستان نے بدھ کے روز ایران میں اپنے شہریوں کو مشورہ دیا کہ وہ حالیہ پیش رفت کی روشنی میں تہران میں اس کے مشن کے تجویز کردہ راستوں کا استعمال کرتے ہوئے ملک سے “جلدی باہر نکل جائیں”۔ایک ایڈوائزری میں، تہران میں ہندوستانی سفارت خانے نے بھی اس بات کا اعادہ کیا کہ “سفارت خانے کے ساتھ پیشگی مشاورت اور ہم آہنگی کے بغیر کسی بین الاقوامی زمینی سرحد تک پہنچنے کی کوشش نہیں کی جانی چاہیے”۔
ہندوستانی مشن نے X پر ایک پوسٹ میں کہاکہ”07 اپریل 2026 کی ایڈوائزری کے تسلسل میں، اور حالیہ پیش رفت کی روشنی میں، ایران میں موجود ہندوستانی شہریوں کو سختی سے مشورہ دیا جاتا ہے کہ وہ سفارت خانے کے ساتھ ہم آہنگی اور سفارت خانے کے تجویز کردہ راستوں کو استعمال کرتے ہوئے تیزی سے ایران سے نکل جائیں” ۔یہ ایڈوائزری امریکہ اور ایران کے درمیان دو ہفتے کی مشروط جنگ بندی پر اتفاق کے چند گھنٹے بعد سامنے آئی ہے جس میں آبنائے ہرمز کو جہاز رانی کے لیے کھولنا بھی شامل ہے۔سرکاری اعداد و شمار کے مطابق، 28 فروری کو جب تنازعہ شروع ہوا تو تقریباً 9,000 ہندوستانی بشمول طلبا ایران میں تھے۔ اب تک تقریبا 1,800 ہندوستانی ہندوستان واپس آچکے ہیں۔28 فروری کو امریکہ اور اسرائیل نے مشترکہ طور پر ایران پر حملہ کیا جس میں ایرانی سپریم لیڈر آیت اللہ علی خامنہ ای اور کئی اعلی کمانڈروں کو ہلاک کر دیا گیا۔ اسلامی جمہوریہ کی طرف سے جوابی کارروائی نے جنگ کو پورے خلیجی خطے تک پھیلا دیا۔
