بلال فرقانی
سرینگر// جموں و کشمیر حکومت نے جمعہ کو اس بات کا اعتراف کیاکہ سرینگر میں اچھن کوڑا کرکٹ ڈمپنگ سائٹ سے ماحولیاتی اور صحت عامہ کے خدشات لاحق ہیں اور ساتھ ہی کہا کہ متبادل سہولت کی عدم موجودگی میں لینڈ فل کو فوری طور پر بند کرنا تکنیکی یا قانونی طور پر ممکن نہیں ہے۔حکومت نے کہا کہ اچھن سائٹ 1986 سے سرینگر میونسپل حدود کے ٹھوس فضلہ کو ٹھکانے لگانے کی سہولت کے طور پر کام کر رہی ہے۔اس میں کہا گیا ہے کہ کئی دہائیوں کے دوران 11لاکھ ٹن فضلہ کے جمع ہونے کی وجہ سے وقتاً فوقتاً ماحولیاتی اور صحت سے متعلق خدشات پیدا ہوئے ہیں۔حکومت نے کہا کہ سرینگر میونسپل کارپوریشن نے سالڈ ویسٹ مینجمنٹ رولز 2016 کی تعمیل میں سائنسی اقدامات شروع کئے ہیں۔ان میں فضلے کی بائیو مائننگ اور بائیو میڈیشن، لیچیٹ ٹریٹمنٹ پلانٹ، ماحولیاتی نگرانی، بدبو پر قابو پانے کے اقدامات اور ماحولیاتی اور صحت کے اثرات کو کم کرنے کے لیے گرین بفر زون کی ترقی شامل ہیں۔
مقامی باشندوں کی جانب سے سائٹ کو بند کرنے کا مطالبہ کا جواب دیتے ہوئے، حکومت نے تصدیق کی کہ عوامی گذارشات موصول ہوئے ہیں اور اس پر غور کیا جا رہا ہے۔تاہم، اس نے کہا کہ لینڈ فل کو فوری طور پر بند کرنا سرینگر کے سائز کے شہر کے لیے مکمل طور پر آپریشنل متبادل کچرے کو ٹھکانے لگانے کی سہولت کے بغیر ممکن نہیں ہے۔اس کے بجائے، حکومت نے اچانک منتقلی کی بجائے سائنسی تدارک کے ذریعے مرحلہ وار بندش کی پالیسی اپنائی ہے۔اس میں کہا گیا ہے کہ ایس ایم سی نے تقریباً 1.1 ملین میٹرک ٹن لیگیسی ویسٹ کی بائیو مائننگ اور بائیو میڈیشن اور پرانے ویسٹ سیلز کی سائنسی کیپنگ شروع کر دی ہے۔انتظامیہ سوچھ بھارت مشن-اربن 2.0 اور CITIES 2.0 کے تحت کچرے کی پروسیسنگ کے مربوط انفراسٹرکچر کو بھی تیار کر رہی ہے، جس کا مقصد لینڈ فلنگ کو کم سے کم کرنا اور انجینئرڈ سینیٹری لینڈ فل کے طریقوں پر منتقل کرنا ہے۔متبادل جگہ کی نشاندہی کے سوال پر، حکومت نے کہا کہ سرینگر میونسپل کارپوریشن کے دائرہ اختیار میں ایک نئی میونسپل ٹھوس فضلہ کو ٹھکانے لگانے کی سہولت کے قیام کے لیے فی الحال کوئی مناسب زمین دستیاب نہیں ہے۔اس میں مزید کہا گیا کہ سرینگر کے ڈپٹی کمشنر نے اس مقصد کے لیے موزوں ریاستی اراضی کی نشاندہی کرنے کے لیے ضلع کے تمام تحصیلداروں کے ساتھ معاملہ اٹھایا ہے۔اچھن لینڈ فل طویل عرصے سے اس کے آس پاس کے رہائشیوں کے لیے ایک فلیش پوائنٹ رہا ہے، جنہوں نے بار بار بدبو، زیر زمین پانی کی آلودگی اور صحت کے بڑھتے ہوئے مسائل پر تشویش کا اظہار کیا ہے۔
