تازہ نظریات اور اُن کی اِختراعی صلاحیتیں روشن مستقبل کی تعمیر کیلئے ایک طاقتور قوت :منوج سنہا
عظمیٰ نیوز سروس
جموں//لیفٹیننٹ گورنر منوج سِنہا نے بدھ کے روز نوجوانوںسے اِنقلابی اِختراعات پر زور دیا۔ اُنہوں نے نوجوانوں سے کہا کہ وہ صرف اپنی تقدیر بدلنے کے لئے نہیں بلکہ دُنیا کی نئی تقدیر بنانے کے لئے بھی لگن اور عزم کے ساتھ کام کریں۔اُنہوں نے کہا’’مقصد کو حاصل کرنے والا مرکوز اور نڈر جذبہ صرف نوجوانوں میں پایا جا سکتا ہے۔ یہ بے خوفی اور نوجوانوں کی ہمت راکٹ کے ایندھن کی مانند ہے جو نمایاں سماجی تبدیلی اور ٹیکنالوجی کے نئے آلات کی تیز رفتار ترقی لاتی ہے۔‘‘لیفٹیننٹ گورنر جموں کی کلسٹر یونیورسٹی کے زیر اہتمام ثقافتی اور اَدبی میلہ ’یووترنگ‘ کے اِختتامی پروگرام سے خطاب کررہے تھے۔ اُنہوں نے نوجوانوں پر زور دیا کہ وہ نئی اَقدار پیدا کریں اور ترقی یافتہ معاشرے کی تشکیل کریں۔ اُنہوں نے کہا کہ نوجوانوں کے تازہ نظریات اور اُن کی اِختراعی صلاحیتیں روشن مستقبل کی تعمیر کے لئے ایک طاقتور قوت ہیں۔لیفٹیننٹ گورنر نے کہا ’’ نوجوانوں کوتبدیلی کے محرک کے طور پر اخلاقی ہمت، توانائی اور یقین کے ساتھ تاریخ کا رُخ بدلنا چاہیے اور آنے والی نسل کے لئے نئی راہیں تیار کرنی چاہئیں۔”اُنہوںنے مختلف زُمروں میں شاندار کارکردگی دِکھانے والے طالب علموںکو اعزاز سے نوازا۔ پدم شری پدما سچدیو حکومت کالج برائے خواتین، گاندھی نگر نے یووترنگ۔2025 کے لئے رولنگ ٹرافی حاصل کی۔ اِختتامی پروگرام میں ایڈیشنل چیف سیکرٹری محکمہ اعلیٰ تعلیم شانت منو،وائس چانسلر کلسٹریونیورسٹی جموں پروفیسر کے ایس چندر شیکھر،ڈین سٹوڈنٹس ویلفیئر پروفیسر ڈی ایس منہاس، سینئراَفسران، تعلیمی اداروں کے سربراہان، اَساتذہ اور طلبأ کی بڑی تعداد نے شرکت کی۔
