یو این آئی
گوہاٹی/مارکو یانسن کی شاندار چھ وکٹوں اور سائمن ہارمر کی عمدہ تین وکٹوں کی بدولت جنوبی افریقہ نے دوسرے ٹیسٹ میچ کے تیسرے دن پیر کو لنچ کے بعد ہندوستان کی پہلی اننگز کو 201 رنز پر سمیٹ کر 288رنز کی برتری حاصل کرتے ہوئے میچ پر اپنی گرفت مضبوط کرلی۔ہندوستان کے خلاف 288 رنز کی برتری کے باوجود جنوبی افریقہ نے فالو آن نہیں کرایا اور دوسری اننگز کھیلنے کا فیصلہ کیا اور دن کا کھیل ختم ہونے تک بنا کسی نقصان کے 26رن بنا لئے اور اس طرح سے ہندوستان پر لیڈ بڑھاتے ہوئے 314رن کردی۔ لنچ کے بعد 79ویں اوور میں ہارمر نے واشنگٹن سندر کو ایڈن مارکرم کے ہاتھوں کیچ کروا کر جنوبی افریقہ کو آٹھویں کامایابی دلائی ۔ واشنگٹن سندر اور کلدیپ یادیو نے آٹھویں وکٹ کے لیے 72 رنز کی شراکت قائم کی۔ واشنگٹن سندر نے 92 گیندوں پر دو چوکوں اور ایک چھکے کی مدد سے 48 رنز بنائے ۔ ہندوستان کا آٹھواں وکٹ 194 کے اسکور پر گرا۔ اسی اسکور پر یانسن نے جم کر بیٹنگ کرنے والے کلدیپ یادیو کو آؤٹ کرکے ہندوستان کو نواں دھچکا دیا۔ کلدیپ یادیو نے 134 گیندوں پر 19 رنز بنائے جن میں تین چوکے شامل تھے ۔ بعد ازاں یانسن نے 84ویں اوور کی پانچویں گیند پر جسپریت بمراہ (پانچ) کو وکٹ کیپر کائیل ویرین کے ہاتھوں کیچ کروا کرہندوستان کی اننگز 201 رنز پر سمیٹ دی۔ہندوستانی ٹیم نے اگرچہ اچھی شروعات کی تھی جب راہل اور جیسوال نے نصف سنچری شراکت قائم کی، لیکن اس کے بعد کوئی بھی بلے باز کریز پر زیادہ دیر نہ ٹھہر سکا۔ مارکو یانسن کی قیادت میں جنوبی افریقی بالرز نے بہترین کارکردگی دکھاتے ہوئے ہندوستانی بلے بازوں کو سنبھلنے کا کوئی موقع نہ دیا۔ کلدیپ اور واشنگٹن سندر کے درمیان نصف سنچری شراکت ضرور بنی مگر وہ ناکافی ثابت ہوئی۔اس سے قبل ہندوستانی ٹیم نے ابتدائی جھٹکوں سے سنبھلتے ہوئے لنچ تک سات وکٹوں کے نقصان پر 174 رنز بنا لئے تھے ، جس میں واشنگٹن سندر (33*) اور کلدیپ یادیو (14*) نے اہم کردار ادا کیا۔ چائے کے وقفے کے بعد یانسن نے ریسبھ پنت(سات) کو آؤٹ کرکے ہندوستانی کوششوں کا خاتمہ کیا۔ پھر انہوں نے نیتیش کمار ریڈی (10) اور رویندر جڈیجا (چھ) کو آؤٹ کر کے ہندوستان کو مزید مشکلات میں ڈال دیا۔ ایسے میں واشنگٹن سندر اور کلدیپ یادیو نے ذمہ دارانہ بیٹنگ کرتے ہوئے ہندوستانی اننگز کو سہارا دینے کی کوشش جاری رکھی۔دن کے پہلے سیشن میں، یشسوی جیسوال اور کے ایل راہل کی اچھی شروعات کے باوجود جنوبی افریقہ کے باؤلرز نے میچ پر گرفت مضبوط کرلی۔ سائمن ہارمر کی قیادت میں انہوں نے چائے کے وقفے تک ہندوستان کے 102 رنز پر چار کھلاڑی آؤٹ کر دیے تھے ۔ہندوستان نے کل کے اسکور نو رنز بغیر نقصان سے آگے کھیلنا شروع کیا۔ ایڈن مارکرم ایک ٹیسٹ اننگز میں پانچ کیچ پکڑنے والے جنوبی افریقہ کے دوسرے فیلڈر بن گئے اس سے قبل گریم اسمتھ یہ کارنامہ انجام دے چکے ہیں۔
