عظمیٰ نیوز سروس
سرینگر//بڈگام حلقہ انتخاب کے نو منتخب رکن اسمبلی اور پی ڈی پی لیڈر آغا سید منتظر نے بڈگام کے لوگوں کا ایک بار پھر شکریہ ادا کرتے ہوئے کہا ہے کہ وہ لوگوں کی امیدوں پر کھرا اترنے کی کوشش کریں گے ۔ انہوں نے کہاکہ نیشنل کانفرنس کی طرف سے بڈگام کے لوگوں کے ساتھ جونا انصافیاں کی گئی ہیں، میں ان کو دور کرنے کی جی توڑ کوشش کروں گا’۔ موصوف رکن اسمبلی نے ان باتوں کا اظہار جمعہ کو جموں میں رکن اسمبلی کی حیثیت سے حلف لینے کے بعد نامہ نگاروں کے ساتھ بات کرنے کے دوران کیا۔ انہوں نے کہاکہ بڈگام میں لوگوں کا پی ڈی پی کو ووٹ دے کر کامیاب کرنا ایک اجتماعی فیصلہ تھا۔ انہوں نے کہاکہ’بڈگام کے لوگوں نے اس بار پی ڈی پی کو اعتماد دیا تاکہ ان کے مسائل کو حل کیا جا سکے کیونکہ بڈگام وہ واحد حلقہ انتخاب ہے جہاں لوگ آج بھی بنیادی سہولیات جیسے پینے کے صاف پانی، بہتر سڑکوں، بہتر ہسپتال سے محروم ہیں’۔ ان کا کہنا تھا: ‘میری سب سے پہلے یہی کوشش رہے گی کہ لوگوں کو در پیش مسائل کو حل کیا جاسکے ‘۔ انہوں نے کہا کہ ریزرویشن کا مسئلہ بھی ایک اہم مسئلہ ہے اس کے لئے بھی ہم اپنی آواز بلند کریں گے ۔
