عظمیٰ نیوز سروس
سرینگر// وادی کشمیر میں خشک موسم کے بیچ سردیوں کا زور مسلسل بڑھ رہا ہے جس نے لوگوں کو چلہ کلان کی ٹھنڈ محسوس کرائی ہے۔محکمہ موسمیات کے مطابق گرمائی دارلحکومت سرینگر میں رواں موسم کی ایک اور سرد ترین ریکارڈ ہوئی جب شبانہ درجہ حرارت منفی2.1 ڈگری سینٹی گریڈ ریکارڈ کیا گیا۔سرینگر میں گذشتہ شب کا درجہ حرارت منفی1.6 ڈگری سینٹی گریڈ ریکارڈ ہوا تھا۔ پہلگام سب سے سرد ترین مقام رہا ہے جہاں کم سے کم درجہ حرارت منفی 3.8 ڈگری سینٹی گریڈ ریکارڈ ہوا ۔ گلمرگ میں کم سے کم درجہ حرارت منفی0.5 ڈگری درج ہوا جبکہ سرحدی ضلع کپوارہ میں شبانہ درجہ حرارت منفی2.2 ڈگری اور قاضی گنڈ میں کم سے کم درجہ حرارت منفی1.5 ڈگری سینٹی گریڈ ریکارڈ ہوا ۔محکمہ موسمیات نے 15 نومبر تک عام طور پر خشک موسم، 16 نومبر کو دوپہر تک عام طور پر ابر آلود اور پھر 17 نومبر سے 19 نومبر تک موسم خشک رہنے کی پیش گوئی کی ہے۔جموں شہر میں 10.2، کٹرہ 9.5، بٹوٹ 2.9 اور بھدرواہ میں ایک ڈگری کم سے کم درجہ حرارت ریکارڈ کیا گیا۔
