سرینگر جموں قومی شاہراہ پر اضافی دستے تعینات
سرینگر// پولیس نے جنوبی کشمیر کے پلوامہ، اننت ناگ، کولگام اور شوپیان اضلاع میں وسیع پیمانے پر سرچ آپریشن اور گاڑیوں کی چیکنگ مہم تیز کر دی ہے ، جس کا مقصد غیر قانونی سرگرمیوں پر قابو پانا، مشتبہ نقل و حرکت پر نظر رکھنا، اور قانون نافذ کرنے والے اداروں کے حفاظتی جال کو مزید مضبوط بنانا ہے ۔ پولیس حکام کے مطابق، یہ کارروائی موجودہ سیکورٹی صورتحال اور ملی ٹینٹوںکے ممکنہ خطرات کے پیش نظر کی جا رہی ہے تاکہ امن و قانون کی فضا کو برقرار رکھا جا سکے ۔ گزشتہ روز دہلی میں ہوئے لال قلعہ دھماکے کے بعد وادی بھر میں سیکورٹی ایجنسیاں ہائی الرٹ پر ہیں اور ہر ضلع میں پولیس نے چوکسی کے غیر معمولی اقدامات کیے ہیں۔
پلوامہ میں پولیس اور فورسز نے مختلف علاقوں میں اچانک ناکے لگا کر درجنوں گاڑیوں کی تلاشی لی، جن میں نجی، تجارتی اور دو پہیہ گاڑیاں شامل تھیں۔ گاڑیوں کے کاغذات کی جانچ کی گئی اور کئی گاڑی مالکان کے خلاف کارروائی عمل میں لائی گئی جنہوں نے خریداری کے باوجود ملکیت اپنی نام منتقل نہیں کی تھی۔ سینکڑوں گاڑیوں کو ٹریفک قوانین کی خلاف ورزی پر چالان کیا گیا۔ اسی طرح،شوپیان، کولگام اور اننت ناگ میں بھی پولیس نے اہم شاہراہوں، داخلی راستوں اور حساس علاقوں میں ناکے لگا کر جامع تلاشی مہم چلائی۔ سیکورٹی فورسز نے مشکوک گاڑیوں اور افراد کی شناخت کی تصدیق کی، جبکہ اونتی پورہ پولیس نے قومی شاہراہ اور اس سے ملحقہ سڑکوں پر سخت نگرانی رکھی تاکہ کسی بھی ممکنہ غیر قانونی نقل و حرکت کو روکا جا سکے ۔ ادھربانڈی پورہ پولیس نے کل ضلع کے مختلف حصوں میں ایک وسیع گاڑی چیکنگ ڈرائیو کی۔اس دوران ضلع گاندربل کے اہم داخلی اور خارجی راستوں پر عارضی چوکیاں قائم کی گئی اوراعلی پولیس افسران کی نگرانی میں بڑی تعداد میں گاڑیوں کی مکمل جانچ پڑتال کی گئی اور متعدد گاڑیاں درست دستاویزات نہ ہونے پر ضبط کی گئیں۔ پولیس کی ٹیموں نے مناسب رجسٹریشن کاغذات، لائسنس، اور ممنوعہ مواد یا مشکوک اشیا کی نقل و حمل کے لیے گاڑیوں کا معائنہ کیا۔ادھر سوپور میں بھی پولیس نے کئی مقامات پر ناکے لگائے اور تلاشی لی۔چیکنگ کا بنیادی مقصد غیر قانونی سرگرمیوں کو روکنا، روڈ سیفٹی کو یقینی بنانا اور ٹریفک اور سیکورٹی کے ضوابط کو مثر طریقے سے نافذ کرنا تھا۔ ادھر سری نگر جموں شاہراہ اور دیگر اہم سڑکوں پر گاڑیوں کی سخت چیکنگ مہم شروع کر دی گئی ہے تاکہ مشتبہ سرگرمیوں پر قابو پایا جا سکے اور کسی بھی غیر قانونی یا ممنوعہ سامان کی نقل و حمل کو روکا جا سکے۔ پولیس ٹیموں کو مختلف اسٹریٹیجک مقامات پر تعینات کیا گیا ہے جو نجی کاروں، کمرشل ٹرانسپورٹ اور موٹر سائیکلوں سمیت ہر قسم کی گاڑیوں کی باریک بینی سے تلاشی لے رہی ہیں۔ یہ چیکنگ کارروائیاں امن و امان برقرار رکھنے، جرائم کی روک تھام اور عوامی تحفظ کو یقینی بنانے کے لیے کی جا رہی ہیں۔پولیس نے عوام سے اپیل کی ہے کہ وہ چیکنگ کے دوران مکمل تعاون کریں اور کسی بھی مشکوک شخص یا سرگرمی کی اطلاع فوری طور پر قریبی پولیس اسٹیشن کو دیں۔
