عظمیٰ نیوز سروس
سرینگر//وزیر تعلیم سکینہ ایتو نے جمعرات کو کہا کہ جموں و کشمیر میں تمام امتحانات وقت پر اور تعلیمی کیلنڈر کے مطابق ہوں گے۔ انہوں نے یہ بھی کہا کہ حکومت طلبا کو درپیش تعلیمی نقصان کی تلافی کے لیے تمام سٹیک ہولڈرز سے تجاویز طلب کر رہی ہے۔نامہ نگاروں سے بات کرتے ہوئے وزیر ایتو نے کہا کہ ابتدائی طور پر جموں و کشمیر میں جنگ جیسی صورتحال، ہیٹ ویو اور پھر سیلاب جیسی صورتحال کی وجہ سے طلبا کی پڑھائی بری طرح متاثر ہوئی۔انہوں نے یہ بھی کہا کہ دونوں خطوں میں کچھ سکول حالیہ سیلاب اور قدرتی آفات سے متاثر ہوئے اور نقصان پہنچا۔ لیکن جہاں تک امتحانات کا تعلق ہے، میں یہ واضح کرنا چاہتی ہوں کہ تمام امتحانات وقت پر ہوں گے۔انہوں نے مزید کہا کہ محکمہ اس سال مختلف حالات کی وجہ سے طلبا کو درپیش تعلیمی نقصان کی تلافی کے لیے تمام سٹیک ہولڈرز سے تجاویز طلب کر رہا ہے۔انہوں نے مزید کہا کہ “پچھلے سال ہم نے مارچ سے نومبر سے دسمبر تک تعلیمی سیشن کو تبدیل کیا، یہ ایک بڑا چیلنج تھا اور اب ہم نے اسے کافی حد تک ہموار کر دیا ہے،” ۔
