کشمیر میں اگلے چوبیس گھنٹوں تک موسم گرم اور مرطوب رہنے کا امکان

عظمیٰ ویب ڈیسک
سری نگر/محکمہ موسمیات کی پیش گوئی کے مطابق وادی کشمیر میں اگلے چوبیس گھنٹوں کے دوران موسم گرم اور مرطوب رہنے کا امکان ہے تاہم اس دوران گرج چمک کے ساتھ کہیں کہیں بارشیں بھی متوقع ہیں۔محکمے نے اپنی ایڈوائزری میں کسانوں سے 3 اگست تک کاشتکاری سے متعلق سرگرمیاں جاری رکھنے کا مشورہ دیا ہے۔
متعلقہ محکمے کے ایک ترجمان نے بتایا کہ وادی میں 2 اور 3 اگست کو موسم گرم اور مرطوب رہنے کا امکان ہے تاہم اس دوران کہیں کہیں بارشیں ہوسکتی ہیں جبکہ جموں صوبے میں کچھ مقامات پر درمیانی درجے کی بارشوں کا امکان ہے۔انہوں نے کہا کہ 4 سے 6 اگست تک دن کے دوران موسم گرم اور مرطوب رہنے کا امکان ہے جبکہ اس دوران جموں و کشمیر کے کچھ مقامات پر ہلکی سے درمیانی درجے کی بارشوں کا امکان ہے جبکہ جموں صوبے کے راجوری، ریاسی، اودھم پور، ڈوڈہ، جموں اور کٹھوعہ اضلاع میں کہیں کہیں خاص طور پر صبح اور شام کے وقت تیز اور بھاری بارشیں ہوسکتی ہیں۔ان کا کہنا تھا کہ 7 سے 9 اگست تک موسم عام طور پر گرم اور مرطوب رہ سکتا ہے اور اس دوران ہلکی بارشوں کا بھی امکان ہے۔
انہوں نے کہا کہ بعد ازاں 10 اور 11 اگست کو کئی مقامات پر گرج چمک کے ساتھ بارشوں کا امکان ہے۔محکمے نے اپنی ایڈوائزری میں جموں صوبے میں 4 سے 6 اگست تک کچھ مقامات پر تیز اور بھاری بارشیں ہوسکتی ہیں جبکہ اس دوران کہیں کہیں سیلابی ریلے، لینڈ سلائیڈنگ اور پتھر کھسک آنے کے بھی خطرات ہیں۔ایڈوائزری میں کسانوں سے 3 اگست تک کاشتکاری سے متعلق سرگرمیاں جاری رکھنے کا مشورہ دیا گیا ہے۔