عظمیٰ ویب ڈیسک
سری نگر/محکمہ موسمیات کی پیش گوئی کے عین مطابق جموں وکشمیر میں رک رک کر بارشیں ہو رہی ہیں اور یہ سلسلہ اگلے 48 گھنٹوں کے دوران جاری رہنے کا امکان ہے۔محکمے نے اپنی ایڈوائزری میں کہا ہے کہ اس دوران جموں و کشمیر میں کہیں کہیں تیز بارشوں کے ساتھ تیز ہوائیں چل سکتی ہیں اور کچھ مقامات پر سیلابی ریلے، لینڈ سلائیڈنگ اور پتھر کھسک آنے کے بھی خطرات ہیں۔
متعلقہ محکمے کے ایک ترجمان نے بتایا کہ جموں وکشمیر میں 23 اور 24 جولائی کو گرج چمک کے ساتھ کئی مقامات پر ہلکی سے درمیانی درجے کی بارشوں کا امکان ہے۔انہوں نے کہا کہ اس دوران جموں صوبے کے پونچھ، رام بن، راجوری، اودھم پور، ریاسی اور کٹھوعہ اضلاع میں کہیں کہیں تیز بارشیں ہوسکتی ہیں جبکہ کشمیر میں کئی مقامات پر ہلکی سے درمیانی درجے کی بارشیں متوقع ہیں۔ان کا کہنا ہے کہ 25 سے 27 جولائی تک موسم گرم اور مرطوب رہنے کا امکان ہے تاہم اس دوران کہیں کہیں بوندا باندی ہوسکتی ہے۔
موصوف ترجمان نے بتایا کہ بعد میں 28 سے 30 جولائی تک رک رک کر ہلکی سے درمیانی درجے کی بارشوں کا امکان ہے تاہم اس دوران صوبہ جموں کے کچھ علاقوں میں صبح کے وقت تیز بارشیں ہوسکتی ہیں۔
محکمے نے اپنی ایڈوائزری میں کہا ہے کہ جموں و کشمیر میں 23 اور 24 جولائی کو کہیں کہیں تیز بارشوں کے ساتھ تیز ہوائیں چل سکتی ہیں اور کچھ مقامات پر سیلابی ریلے، لینڈ سلائیڈنگ اور پتھر کھسک آنے کے بھی خطرات ہیں۔انہوں نے کہا کہ اس دوران دریائوں، ندی نالوں میں پانی کی سطح میں اضافہ ہوسکتا ہے اور نشیبی علاقوں میں پانی جمع ہوسکتا ہے۔کسانوں سے کہا گیا ہے کہ وہ 25 سے 27 جولائی تک کاستکاری سے متعلق اپنی سرگرمیاں بحال کر سکتے ہیں۔
جموں وکشمیر میں اگلے 48 گھنٹوں کے دوران مزید بارشوں کا امکان
