عمران احمد
اللہ تعالیٰ نے انسان کو جن بے شمار نعمتوں سے نوازا ہے، ان میں سے زبان ایک بہت بڑی نعمت ہے۔ زبان قلوب و اذہان کی ترجمان ہے۔ جیسی انسان کی سوچ ہوگی، ویسا ہی زبان بولے گی۔ زبان کا صحیح استعمال، ذریعہ حصول ِثواب ہے اور غلط استعمال وعیدِ عذاب ہے۔ یہ انسانی جسم کا ایک چھوٹا سا حصہ ہے، لیکن اس کے کرشمے بہت بڑے بڑے ہیں، اس کی خوبیاں بھی بہت ہیں اور خامیاں بھی بہت، اس کے ذریعے انسان چاہے تو اپنی آخرت کے لئے نیکیاں بھی جمع کر سکتا ہےاور چاہے تو اپنی آخرت برباد کرسکتا ہے۔ اسی وجہ سے کثرتِ کلام سے بھی منع کیا گیا ہے۔زبان ہی سے آدمی کےعقل وشعور اور اس کی صلاحیتوں کاپتا چلتا ہے، لیکن اس نعمت کا استعمال اگر غلط طریقے سے ہو تو یہ نعمت اللہ کی ناراضی کا باعث بن جاتی ہے اور لوگوں کے دل بھی اس سے زخمی ہوتے ہیں۔ یاد رکھیے، زبان کا زخم تیروسنان کے زخم سےزیادہ کاری ہوتا ہے۔ اسی لیے زبان کےخوف سے بڑے بڑے بہادر لرزتے ہیں۔ سب سے زیادہ غلطیاں انسان زبان سے ہی کرتا ہے۔لہٰذا عقل مند لوگ اپنی زبان کو سوچ سمجھ کر اور اچھے طریقے سے استعمال کرتے ہیں۔ زبان کو غلط اور بری باتوں سے بچا کر اچھے طریقے سے استعمال کرنا زبان کی حفاظت کہلاتا ہے۔ ہمارے دین اسلام میں زبان کی حفاظت کو بہت اہمیت دی گئی ہے۔انسان کو ہمیشہ سوچ سمجھ کر بولنا چاہیے ۔ ایسے ہی بلا وجہ فضول بولتے رہنے سے ایک انسان کی شخصیت متاثر ہوتی ہے۔ عقل مند انسان کی یہ صفت ہوتی ہے کہ وہ ہمیشہ سوچ کر بولتا ہے، جب کہ بےوقوف بول کر سوچتا ہے، جہاں اسے معلوم ہو کہ اس جگہ میری بات کی قدر نہیں ہے تو وہاں خاموشی اختیا ر کئے رکھے ،کیونکہ زبان سے نکلی ہوئی بات اور کمان سے نکلا ہوا تیر کبھی واپس نہیں آ سکتے۔ لہٰذا احتیاط افسوس سے بہتر ہے کے اصول کو ہر جگہ مدنظر رکھا جائے۔ہمارے پیارے نبیؐ کا فرمان ہےکہ جو شخص اللہ اور یوم آخرت پر ایمان رکھتا ہے، وہ بھلائی کی بات کہے ،ورنہ خاموش رہے۔اہل ایمان کی گفتگو بہترین اور پرُ تاثیر ہوتی ہے، اور وہ ہمیشہ فضولیات سے احتراز کرتے ہیں۔
فرمانِ نبویؐ ہے ’’ جو شخص مجھے دو چیزوں کی ضمانت دے دے تو میں محمدؐ اۃسے جنّت کی ضمانت دیتا ہوں، ایک زبان اور دوسری شرم گاہ‘‘۔(صحیح بخاری )ایک طرف یہ پیارے رسول اللہؐکی ضمانت و خوشخبری ہے، لیکن دوسری طرف جب ہم اپنے گردو پیش نظر ڈالتے ہیں تو حیرانی ہوتی ہے کہ ہماری محفلیں، اجتماعات، گلی محلوں میں دوستوں کی بیٹھک، بازاروں میں لوگ اور بالخصوص خواتین باہمی گفتگو کیسے کرتے ہیں۔ کیا ہماری باتوں کا اکثر حصہ ایک دوسرے کی غیبت، جھوٹ، چغلی، فضول گوئی اور گالم گلوچ پر مشتمل نہیں ہوتا؟ ہماری نئی نسل کی زبانوں پر موجود گالیاں ہمیں نظر نہیں آتیں؟ ماں باپ اپنے بچوں کے منہ سے گالیاں سن کر بدمزا نہیں ہوتے؟ اس حوالے سے فکر کرنے کی ضرورت ہے۔ اللہ تعالیٰ ہم سب کوزبان کی حفاظت کرنے کی توفیق عطا فرمائے ۔آمین
