عظمیٰ ویب ڈیسک
سرینگر/سخت سیکورٹی بندوبست اور بم بم بولے کے نعروں کی گونج میں شری امرناتھ جی یاترا کے لئے 7 ہزار سے زیادہ یاتریوں کا ساتواں قافلہ منگل کی صبح بھگوتی نگر بیس کیمپ سے کشمیر کے لئے روانہ ہوا۔سرکاری ذرائع نے بتایا کہ بھگوتی نگر بیس کیمپ سے منگل کی صبح 7 ہزار 5 سو 41 یاتریوں پر مشتمل ساتواں قافلہ 3 سو 9 چھوٹی بڑی گاڑیوں میں کشمیر کے لئے روانہ ہوا۔
انہوں نے کہا کہ ان یاتریوں میں سے 4 ہزار 2 سو 20 یاتری ننون پہلگام جبکہ 3 ہزار 2 سو 21 یاتری بالتل بیس کیمپوں کے لئے روانہ ہوئے۔واضح رہے کہ 38 دنوں پر محیط یہ پوتر یاتر 9 اگست کو رکشا بندھن کے موقع پر اختتام پذیر ہوگی۔جموں و کشمیر کے لیفٹیننٹ گورنر منوج سنہا نے 2 جولائی کو بھگوتی نگر بیس کیمپ سے یاتریوں کے پہلے قافلے کو جھنڈٰی دکھا کر روانہ کیا تھا۔سرکاری ذرائع کے مطابق امسال اب تک قریب ایک لاکھ یاتریوں نے پوتر گپھا کے درشن کیے۔
شری امرناتھ یاترا: بھگوتی نگر بیس کیمپ سے 7ہزار سے زیادہ یاتریوں کا ساتواں قافلہ روانہ
