صرف چھٹی جماعت سے بارہویں جماعت تک آن لائن کلاسز مقررہ اوقات میں ہوں گی:محکمہ تعلیم

عظمیٰ ویب ڈیسک
سرینگر/محکمہ تعلیم نے وضاحت کی ہے کہ آن لائن کلاسز صرف چھٹی جماعت سے بارہویں جماعت تک لی جائیں گی، اور پہلی سے پانچویں جماعت کے طلباء کو اس سے مستثنیٰ قرار دیا گیا ہے۔
محکمہ کی طرف سے جاری کردہ سرکاری سرکلر کے مطابق، میونسپل حدود میں آنے والے اسکول صبح 7:30 بجے سے 11:30 بجے تک جبکہ میونسپل حدود سے باہر کے اسکول صبح 8:00 بجے سے دوپہر 12:00 بجے تک کھلے رہیں گے۔
اس کے علاوہ، چھٹی سے بارہویں جماعت تک کے طلباء کے لیے آن لائن کلاسز (بلینڈڈ لرننگ موڈ) اسکول کے باقاعدہ اوقات کے بعد ہوں گی۔ میونسپل علاقوں میں یہ کلاسز دوپہر 12:30 بجے سے 2:00 بجے تک اور غیر میونسپل علاقوں میں دوپہر 1:00 بجے سے 2:30 بجے تک ہوں گی۔
محکمہ نے واضح کیا ہے کہ پرائمری جماعتوں (پہلی سے پانچویں جماعت) کے طلباء آن لائن کلاسز لینے سے مستثنیٰ ہوں گے۔محکمہ تعلیم نے یہ بھی کہا ہے کہ ان ہدایات پر پوری سنجیدگی کے ساتھ عمل کیا جائے اور کسی قسم کی خلاف ورزی نہ کی جائے۔