محمد تسکین
بانہال/3جولائی سے شروع ہونے والی امرناتھ یاترا کی تیاریوں کے سلسلے میں، ڈویژنل کمشنر جموں رمیش کمار اور انسپکٹر جنرل آف پولیس (آئی جی پی) جموں بھیم سین توتی نے جموں-سرینگر قومی شاہراہ پر واقع چندرکوٹ کے لنگر سائٹ اور بانہال کے لامبر گراؤنڈ پر ایک جامع ڈرائی رن معائنہ کیا۔
ان کے ہمراہ ڈپٹی کمشنر رام بن محمد الیاس خان، ڈی آئی جی ڈی کے آر رینج شری دھر پاٹل، ڈی آئی جی ٹریفک ڈاکٹر حسیب مغل، ایس ایس پی رام بن کلبیر سنگھ، ایس ایس پی ٹریفک این ایچ ڈبلیو عادل حمید راجہ، ایڈیشنل ڈپٹی کمشنر رام بن ورنجیت سنگھ چاڑک اور دیگر سول و پولیس انتظامیہ کے سینئر افسران موجود تھے۔
ٹیم نے یاترا کے پرامن انعقاد کے لیے کیے گئے شہری و سیکیورٹی انتظامات کا جائزہ لیا۔
معائنہ کے دوران زائرین کے لیے طعام و قیام، صفائی، طبی امداد اور مؤثر ٹریفک و ہجوم کے نظم و نسق سمیت اہم سہولیات کی تیاری پر خاص توجہ دی گئی۔ لنگر سائٹ پر زائرین کی بلا رکاوٹ نقل و حرکت اور بنیادی سہولیات کی دستیابی کو یقینی بنانے پر زور دیا گیا۔
اس موقع پر ڈویژنل کمشنر اور آئی جی پی جموں نے تمام محکموں کو ہدایت دی کہ وہ تیاریوں کو بروقت مکمل کریں اور زائرین کی سلامتی و سہولت کے لیے فول پروف انتظامات یقینی بنائیں۔
انہوں نے تمام متعلقہ اداروں کے درمیان بہتر تال میل پر زور دیتے ہوئے یاترا کے محفوظ اور کامیاب انعقاد کی اہمیت کو اجاگر کیا۔
