کانگڑا میں شدید بارشوں کے باعث سیلابی ریلے میں 20 مزدور بہہ گئے، دو لاشیں نکالی گئیں

عظمیٰ ویب ڈیسک
کانگڑا/ہماچل پردیش کے کانگڑا ضلع کے دھرم شالہ کے کھنیارا میں اندرا پریہ درشنی ہائیڈرو الیکٹرک پروجیکٹ سائٹ پر شدید بارشوں سے آئے سیلاب میں تقریباً 20 مزدور بہہ گئے۔ ان میں سے دو کی لاشیں نکال لی گئی ہیں۔
وزیر اعلیٰ سکھویندر سنگھ سکھو نے اس حادثے پر افسوس کا اظہار کیا ہے۔ انہوں نے کہا کہ اس حادثے میں اب تک دو لاشیں نکالی جا چکی ہیں اور راحت اور بچاؤ کا کام جنگی بنیادوں پر جاری ہے۔ انتظامیہ کو تمام ضروری اقدامات کرنے کی ہدایت دی گئی ہے۔
وزیراعلی سکھو نے کہاکہ “میں غمزدہ خاندانوں کے ساتھ اپنی گہری تعزیت کا اظہار کرتا ہوں۔ میں ایشور سے دعا کرتا ہوں کہ لاپتہ افراد جلد محفوظ ہو جائیں۔ میں تمام لوگوں سے اپیل کرتا ہوں کہ وہ شدید بارشوں کے دوران ندی نالوں اور کھائیوں کے قریب جانے سے گریز کریں۔” قابل ذکر ہے کہ بدھ کو ضلع کے منونی کھڈ سے دو لاشیں برآمد ہوئی تھیں، جب کہ پن بجلی پروجیکٹ سائٹ کے قریب لیبر کالونی میں رہنے والے تقریباً 20 مزدوروں کے کھنیارہ مانونی کھڈ میں پانی کی سطح بڑھنے سے بہہ جانے کا اندیشہ ہے۔