یو این آئی
نئی دہلی//ہندوستان نے آج 70 ممالک کے سفارت کاروں کو آپریشن سندور کے کامیاب انعقاد کے بارے میں تفصیل سے آگاہ کیا اور پاکستان کی طرف سے شروع کیے گئے پروپیگنڈے کو بھی بے نقاب کیا۔انٹی گریٹڈ ڈیفنس اسٹاف ہیڈ کوارٹر نے منگل کو یہاں بتایا کہ ڈیفنس انٹیلی جنس کے ڈائریکٹر جنرل لیفٹیننٹ جنرل ڈی ایس رانا نے آپریشن سندور کے کامیاب انعقاد کے بارے میں بتایا، جس نے پاک۔ہند تعلقات میں نئے معیارات قائم کیے ہیں۔ انہوں نے کہا کہ آپریشن نے نئے دور کی جنگ میں فوجی برتری کے ذریعے ہندوستان کی طاقت اور قومی عزم کا مظاہرہ کیا۔لفٹیننٹ جنرل رانا نے دہشت گردوں کے ٹھکانوں کو نشانہ بنانے کے عمل کے بارے میں بھی تفصیلی معلومات دیں۔ انہوں نے ان مقاصد کے حصول کے لیے فوج اور فضائیہ کی جانب سے درست آپریشنز اور سخت ردعمل پر تبادلہ خیال کیا۔بات چیت کے دوران انہوں نے آپریشن سندور میں دیسی ہتھیاروں کی جنگی تاثیر کے ساتھ مشترکہ اور انضمام کے ذریعے حاصل کردہ طاقت کے مربوط استعمال پر بھی روشنی ڈالی۔انہوں نے پاکستان کی جانب سے چلائی جارہی ہندوستان مخالف پروپیگنڈہ مہم اور علاقائی امن و استحکام پر اس کے اثرات کے بارے میں بھی آگاہ کیا۔ انہوں نے کہا کہ ہندوستان نے اس کا مناسب جواب دیا ہے۔
