برف باری سے منقطع ہوئے علاقوں کے سڑک رابطے بحال کرنے کیلئے اقدامات اٹھائے جائیں: نیشنل کانفرنس

عظمیٰ ویب ڈیسک
سری نگر/نیشنل کانفرنس نے ڈویژنل انتظامیہ سے برفباری کے نتیجے میں منقطع ہوئے علاقوں کے سڑک رابطے فوری طور پر بحال کرنے کی ضرورت پر زور دیا ہے۔پارٹی کے ترجمان عمران نبی ڈار نے انتظامیہ پر زور دیا ہے کہ وہ برفباری کے نتیجے میں منقطع ہوئے علاقوں اور دیہات کے ساتھ سڑک روابط بحال کرنے کیلئے جنگی بنیادوں پر کام کریں اور ساتھ ہی نشیبی علاقوں سے پانی کی نکاسی کیلئے ضروری مشینری کو کام پر لگایا جائے۔
انہوں نے صوبائی کمشنروں اور ضلع ترقیاتی کمشنروں سے اپیل کی کہ وہ ذاتی طور پر عوام کی راحت رسانی کے اقدامات کی نگرانی کریں اور سرحدی علاقوں میں متعلقہ انتظامیہ اور فیلڈ سٹاف کو متحرک کریں اور ساتھ ہی ان علاقوں میں غذائی اجناس اور ادویات کا وافر سٹاک پہنچایا جائے۔انہوں نے محکمہ بجلی کے حکام سے بھی اپیل کی کہ وہ جنگی بنیادوں ایسے علاقوں میں بجلی کی مکمل سپلائی بحال کریں جہاں برفباری سے ترسیلی لائینوں کو نقصان پہنچا ہے۔
عمران نبی ڈار نے کہا کہ ماہ صیام میں سڑک رابطوں کے منقطع ہونے اور بجلی جیسے بنیادی ضروریات کی عدم موجودگی میں ایسے علاقوں میں لوگوں کو زبردست مشکلات کا سامنا کرنا پڑ رہاہے۔
ان کے مطابق کرناہ، مژھل، ٹنگڈار، گریز، سنتھن، کپرن ، شوپیان، پہلگام ، مروہ ، مڑون ،دھچن اور بانہال کے پہاڑی علاقوں کے علاوہ دیگر دور دراز علاقوں میں جنگی بنیادوں پر برف ہٹائی جائے کیونکہ ان علاقوں میں قیام پذیر لوگوں کو آمد و رفت نہ ہونے کی وجہ سے کافی مشکلات کا سامنا کرنا پڑ رہا ہے۔ خصوصی طور پر بیماروں لانے لیجانے میں کافی مشکلات پیش آرہی ہیں۔
انہوں نے انتظامیہ پر زور دیا کہ ایسے علاقوں کیلئے ہیلی کاپٹر سروس میسر رکھی جائے جو وادی سے کٹ کر رہ گئے ہیں تاکہ ان علاقوں لوگ ایمرجنسی کی صورت میں اس سہولیات سے فائدہ اُٹھا سکیں۔