مساوی اور ہمہ گیر ترقی، حکومت کی اولین ترجیح: نائب وزیراعلیٰ

جموں// نائب وزیر اعلیٰ سریندر چودھری نے موجودہ حکومت کی عوامی پالیسی کی حمایت کرتے ہوئے کہا کہ سماجی اور اقتصادی طور پر عوام کی بااختیاری اور جامع ترقی موجودہ حکومت کا اہم ترین مقصد ہے۔
نائب وزیر اعلیٰ آر ایس پورہ میں جٹ سبھا کے زیر اہتمام ایک تقریب سے خطاب کر رہے تھے۔
اس موقع پر ایم ایل اے جموں مشرق، وکرما رندھاوا، سابق وزراء منجیت سنگھ، چودھری سُکھنندن، گھرو رام، ڈی ڈی سی ممبر ٹی ایس ٹونی اور جٹ سبھا کے سینئر عہدیداروں کے ساتھ دیگر معزز شخصیات بھی موجود تھیں۔
نائب وزیر اعلیٰ نے عوامی پالیسیوں پر بات کرتے ہوئے کہا کہ ہم ترقی کو بغیر کسی امتیاز کے یکساں طور پر آگے بڑھا رہے ہیں۔
انہوں نے کہا، “ہم نے جموں و کشمیر بھر میں ترقیاتی منصوبوں کی رفتار تیز کرنے کی ہدایات جاری کی ہیں اور ان منصوبوں پر مسلسل نگرانی بھی کی جا رہی ہے تاکہ ترقیاتی عمل کی رفتار میں مزید اضافہ کیا جا سکے”۔
اس موقع پر جٹ سبھا کے ارکان نے حکومت کی طرف سے اپنی کمیونٹی کو نمائندگی دینے پر وزیر اعلیٰ کا شکریہ ادا کیا۔
بعد ازاں، نائب وزیر اعلیٰ نے جٹ سبھا کے زیر اہتمام لوہڑی کے تہوار کے حوالے سے منعقدہ ایک اور تقریب میں شرکت کی۔
وہاں لوگوں سے گفتگو کرتے ہوئے، انہوں نے امید ظاہر کی کہ لوہڑی کا تہوار جموں و کشمیر میں امن اور خوشحالی کا پیغام لے کر آئے گا۔