کٹرا میں ریل مسافروں کیلئے ٹرین تبدیل کرنے کا فیصلہ، پی ڈی پی کی سخت تنقید

سرینگر// پیپلز ڈیموکریٹک پارٹی (پی ڈی پی) نے ان اطلاعات پر شدید تنقید کی ہے کہ کشمیر آنے اور جانے والے ٹرین مسافروں کو کٹرا میں سیکیورٹی وجوہات کی بنا پر لازمی طور پر ٹرین سے اتارا جائے گا۔ پارٹی نے اس اقدام کو عوام کے لیے غیر ضروری اور ناقابل قبول پریشانی قرار دیا ہے۔
پی ڈی پی نے اِس فیصلے کو وادی کے عوام پر ایک اضافی بوجھ قرار دیتے ہوئے کہا کہ یہ ان کے لیے مزید مشکلات پیدا کرتا ہے۔
پی ڈی پی کے جنرل سیکرٹری محمد خورشید عالم نے کہا کہ یہ اقدام کشمیری عوام کو سفری سہولت فراہم کرنے کے دعوے کو جھوٹا ثابت کرتا ہے۔
انہوں نے کہا، “کئی سالوں سے کہا جا رہا تھا کہ کشمیر کے لیے ٹرین سروس عام لوگوں کو سہولت فراہم کرے گی اور ان کے سفر کو آسان بنائے گی، لیکن یہ حالیہ ہدایت ظاہر کرتی ہے کہ کشمیری عوام ابھی بھی حقیقی سفری آسانیوں سے محروم ہیں۔ یہ خدمات، جو بڑی دھوم دھام کے ساتھ شروع کی گئی تھیں، اب محض ایک دکھاوا بن گئی ہیں”۔
عالم نے مزید کہا کہ یہ فیصلہ مسافروں، خاص طور پر بزرگوں اور طبی سہولت کے لیے سفر کرنے والوں کے لیے مشکلات کا باعث بنے گا۔
انہوں نے کہا، “سیکیورٹی خدشات کو بہانے کے طور پر استعمال نہیں کیا جانا چاہیے۔ سفر کے آغاز پر ہی مناسب چیکنگ کی جا سکتی ہے۔ مسافروں کو راستے میں زبردستی اترنے اور دوبارہ سوار ہونے پر مجبور کرنا نہ صرف غیر عملی بلکہ بے عزتی کے مترادف ہے”۔