عظمیٰ ویب ڈیسک

سرینگر// کشمیر ٹریڈرز اینڈ مینو فیکچررز فیڈریشن (کے ٹی ایم ایف) اور کشمیر اکنامک الائنس (کے ای اے) نے بدھ کے روز سرینگر کے بینکوئٹ ہال میں ڈپٹی کمشنر سرینگر، ڈاکٹر بلال محی الدین بھٹ سے ملاقات کی، جس میں شہر کے تجارتی مراکز کے تاجروں اور ٹرانسپورٹروں کو درپیش مسائل اور مطالبات پر بات چیت کی گئی۔
کے ٹی ایم ایف کے صدر محمد یاسین خان کی قیادت میں تاجروں کے مختلف ایسوسی ایشنز، خصوصاً لال چوک، ریگل چوک، ہری سنگھ ہائی سٹریٹ، مہاراجہ بازار اور ملحقہ علاقوں کے نمائندوں نے اس اجلاس میں شرکت کی۔ تاجران ایسوسی ایشن سینٹرل لال چوک کے صدر فیروز احمد بابا نے لال چوک کے کاروباری طبقے کو درپیش مسائل پر روشنی ڈالی۔
محمد یاسین خان، جو کشمیر اکنامک الائنس (کے ای اے) کے سربراہ بھی ہیں، نے شہر کے تجارتی علاقوں میں جاری ترقیاتی کاموں کی تکمیل، ڈرینج سسٹم کی بہتری، عوامی واش رومز اور پینے کے پانی کی سہولتوں کو فعال بنانے، مارکیٹوں میں صفائی ستھرائی، سٹریٹ لائٹس کی مرمت، اور پارکنگ کی سہولتوں کے قیام جیسے اہم مسائل پر زور دیا۔
ڈپٹی کمشنر نے مسائل غور سے سننے کے بعد متعلقہ محکموں کو ہدایت دی کہ ان مسائل کو ترجیحی بنیادوں پر حل کیا جائے اور تاجروں کے لیے سازگار ماحول فراہم کرنے کا یقین دلایا۔
اجلاس میں شریک اہم نمائندوں میں محمد اسلم متو، عقیب نذیر، دین محمد متو، رؤف احمد شاہ، محمد الطاف بھٹ، امتیاز احمد خان، شبیر احمد ڈابلا، شیخ خالد عزیز، محمد سلیم راتھر، ریگل ٹریڈرز ویلفیئر ایسوسی ایشن کے صدر منظور احمد میر، مہاراجہ بازار ٹریڈرز ایسوسی ایشن کے جنرل سیکرٹری فہیم احمد بھٹ، تاجران ایسوسی ایشن کے صدر عارف کریم، لال بازار ایسوسی ایشن کے صدر پیر انتخاب عالم، نوشہرہ ایسوسی ایشن کے صدر شبیر احمد نقش، گوسیہ ایسوسی ایشن کھانیار کے صدر لطیف احمد صوفی، اور منور آباد ایسوسی ایشن کے صدر قاضی توصیف شامل تھے۔
اجلاس میں ایڈیشنل ڈپٹی کمشنر سید احمد کتاریا، ریجنل ٹرانسپورٹ آفیسر قاضی عرفان، جنرل منیجر ڈی آئی سی حمیدہ اختر، چیف انجینئر ایس ایس سی سی ایل، جائنٹ کمشنر ایس ایم سی غلام جیلانی، چیف پلاننگ آفیسر فیاض احمد ڈار اور دیگر سینئر افسران نے شرکت کی۔