عظمیٰ نیوز سروس
سرینگر//حکومت نے مالی سال 2024-25کے لیے الیکٹریکل بسوں کے عملی نفاذ کے لیے 16 کروڑ روپے جاری کرنے کی منظوری دی ہے۔محکمہ مکانات و شہری ترقی کی کمشنر سیکریٹری مندیپ کور کے مطابق یہ فنڈنگ سری نگر سمارٹ سٹی لمیٹڈ اور جموں سمارٹ سٹی لمیٹڈ کے لیے یکساں طور پر مختص کی گئی ہے، جس میں ہر شہر کے لیے 8 کروڑ روپے مخصوص کیے گئے ہیں۔یہ فنڈ ای بس منصوبے کیلئے خاص طور پر استعمال ہوں گے اور انہیں عمومی مالیاتی ضوابط (جی ایف آر) اور اسکیم کے رہنما اصولوں کے مطابق استعمال کرنا ہوگا۔ حکومت نے واضح کیا ہے کہ فنڈز کو غیر فعال نہ چھوڑا جائے اور انہیں فوری طور پر مطلوبہ مقاصد کے لیے واگزار کیا جائے۔ رقومات کی واگزاری کو مشروط رکھا گیا ہے جس کے مطابق اخراجات کو قائم کردہ قواعد اور طریقہ کار کے خرچ کرنا لازمی ہے اورفنڈز صرف مخصوص مقصد کے لیے استعمال کیے جائیں گے۔آرڈر میں مزید کہا گیا ہے کہ رقومات کی فوری تقسیم کو یقینی بنایا جائے جبکہ خرچ کرنے کی اسناد کی تصدیق متعلقہ حکام کو 31 مارچ 2025 سے پہلے جمع کروانی ہوگی، اور اخراجات کو مالیاتی محکمے کے ذریعہ مجاز کردہ درجہ بندی کے مطابق ہونا چاہیے۔ حالیہ برسوں میں، حکومت نے ای،بسوں کے استعمال میں نمایاں اضافہ کیا ہے، جس سے عوامی نقل و حمل کی سہولت میں بہتری آئی ہے، اور حکومت نے ای،بسوں کے روٹ اور خدمات میں توسیع کرنے کا منصوبہ بنایا ہے۔
