عظمیٰ نیوز سروس
سرینگر// پارلیمنٹ میں پانچ بجٹ پیش کرکئے جانے کے بعد جموں و کشمیر کا بجٹ اگلے مالی سال 2025-26 کیلئے قانون ساز اسمبلی میں پیش کیا جائے گا جب عمر عبداللہ کی سربراہی والی حکومت بجٹ اجلاس بلائے گی۔ اگرچہ وزیر اعلیٰ عمر عبداللہ کے ساتھ پانچ وزراء نے حلف لیا ہے، لیکن محکموں کی تقسیم ابھی باقی ہے اور جسے بھی خزانہ ملے گا اسے جموں و کشمیر یونین ٹیریٹری کا پہلا بجٹ پیش کرنے کا اعزاز حاصل ہوگا۔ڈاکٹر حسیب درابو نے ریاست جموں و کشمیر کا آخری بجٹ 11 جنوری 2018 کو قانون ساز اسمبلی میں 2018-19 کے مالی سال کیلئے 80,313 کروڑ روپے کا پیش کیا تھا۔ تاہم، جون 2018 میں، محبوبہ مفتی کی قیادت والی پی ڈی پی۔بی جے پی مخلوط حکومت حکومت کی حمایت واپس لینے کے بعد گر گئی۔ نومبر 2018 میں اسمبلی تحلیل کر دی گئی۔2019-2020 کے بجٹ کو اس وقت کے گورنر ستیہ پال ملک کی سربراہی میں اس وقت کی ریاستی انتظامی کونسل نے 15 دسمبر 2018 کو 88,911 کروڑ روپے کے حساب سے منظور کیا تھا۔یونین ٹیریٹری کے بعد کے بجٹ بشمول 2020-21، 2021-22، 2022-23، 2023-24 اور 2024-25 جموں و کشمیر میں قانون ساز اسمبلی کی غیر موجودگی میں پارلیمنٹ کے ذریعہ پیش اور منظور کئے گئے۔جاری مالی سال 2024-25 کا بجٹ وزیر خزانہ نرملا سیتا رمن نے 23 جولائی 2024 کو پارلیمنٹ میں پیش کیا جس کی مالیت 1,18,728 کروڑ روپے تھی۔ تاہم، لوک سبھا انتخابات کے پیش نظر پارلیمنٹ میں 5 فروری 2024 کو یونین ٹیروٹری (ووٹ آن اکاؤنٹ) کا عبوری بجٹ لیا گیا تھا۔حکومت کی جانب سے جب بھی بجٹ اجلاس بلایا جائے گا، 2025-26 کا بجٹ قانون ساز اسمبلی میں پیش کیا جائے گا۔ اس سے پہلے جموں میں مقننہ کا بجٹ اجلاس جنوری فروری میں ہوا کرتا تھا۔عہدیداروں نے کہا کہ نئے وزیر خزانہ کی تقرری کے فوراً بعد بجٹ کی تیاریاں شروع ہو جائیں گی کیونکہ بجٹ کے دستاویزات کو حتمی شکل دینے سے پہلے وزارت کو محکمہ کے حساب سے جائزہ لینا ہوتا ہے۔جاری مالی سال سے جموں و کشمیر پولیس کے بجٹ کو مرکزی وزارت داخلہ کی گرانٹس میں شامل کیا گیا ہے۔جموں و کشمیر کے اپنے مالی وسائل بھی نئی حکومت کیلئے تشویش کا باعث ہوں گے، ماہرین نے کہا کہ چونکہ نئی حکومت سے بہت زیادہ توقعات ہیں اور حکمران نیشنل کانفرنس نے بھی کچھ مفت دینے کا وعدہ کیا ہے، اس لیے یہ نئی حکومت کے لئے ایک مشکل کام ہوگا۔ ماہرین نے کہا کہ جموں و کشمیر عام طور پر مرکزی گرانٹس پر منحصر رہا ہے۔2002سے2008 تک پی ڈی پی۔کانگریس مخلوط حکومت میں ابتدائی طور پر مرحوم مفتی محمد سعید اور پھر غلام نبی آزاد کی سربراہی میں رہی، اس وقت پی ڈی پی کے سینئر لیڈران مظفر احمد بیگ اور طارق حمید قرہ وزیر خزانہ تھے جبکہ 2008سے2014 میں این سی۔کانگریس مخلوط حکومت میں، نیشنل کانفرنس کے تجربہ کار عبدالرحیم راتھر کو باوقار وزارت خزانہ کا چارج سونپا گیا تھا۔وہ موجودہ اسمبلی میں دوبارہ منتخب ہوئے ہیں لیکن آج وزارت کی کونسل میں شامل کیے گئے وزراء میں شامل نہیں ہیں۔
