این سی-کانگریس اتحاد کا سورج طلوع ہونے سے پہلے ہی ڈوب گیا: جتیندر سنگھ

جموں// وزیر اعظم دفتر میں تعینات وزیر مملکت ڈاکٹر جتیندر سنگھ نے جمعے کے روز کہاکہ نیشنل کانفرنس اور کانگریس اتحاد میں پھوٹ کے آثار نمایاں ہے۔انہوں نے کہاکہ بی جے پی نے ماضی میں بھی انہیں شکست دی اور موجودہ اسمبلی انتخابات میں بھی بھاجپاحکومت بنانے میں کامیاب ہو جائے گی۔ان باتوں کا اظہار وزیر موصوف نے کٹھوعہ میں چناوی ریلی سے خطاب کے دوران کیا۔
انہوں نے کہاکہ مودی جی کی بدولت آج جموں وکشمیر میں امن و امان واپس لوٹ آیا ہے۔مرکزی وزیر مملکت نے کہا :’دفعہ 370کی منسوخی کے بعد جموں وکشمیر میں حالات یکسر تبدیل ہوئے اور آج کشمیر کے ہر علاقے میں ترنگالہرا رہا ہے۔ ‘
نیشنل کانفرنس اور کانگریس اتحاد میں پھوٹ پڑنے کا دعویٰ کرتے ہوئے مرکزی وزیر مملکت نے کہاکہ نیشنل کانفرنس کے نائب صدر عمر عبداللہ نے کانگریس لیڈر راہل گاندھی پر واضح کیا ہے کہ وہ کشمیر میں پرچار کے بجائے جموں صوبے پر اپنی توجہ مبذول کرئے۔
انہوں نے کہاکہ ہم نے پہلے ہی کہا تھا کہ نیشنل کانفرنس اور کانگریس کے درمیان جو اتحاد ہوا وہ زیادہ دیرتک پائیدار رہنے والا نہیں ہے۔ان کے مطابق موجودہ مرکزی حکومت نے جموں وکشمیر کو نہ صرف امن کا گہوارہ بنایا بلکہ لوگوں کو ان کی دہلیزوں پر انصاف فراہم کرنے کی خاطر کوئی دقیقہ فروگزاشت نہیں کیا۔
مرکزی وزیر نے کہا :’جموں وکشمیر میں جتنے بھی تعمیراتی کام شروع کئے گئے انہیں وقت مقررہ کے اندرا ندر پایہ تکمیل تک پہنچایا جائے گا۔‘انہوں نے الزام لگایا کہ علاقائی سیاسی پارٹیوں نے ہمیشہ مذہب کے نام پر سیاست کی لہذا ایسے سیاستدانوں کواب سبق سکھانے کی ضرورت ہے۔