! کشمیرکی دستکاریاںاورکشمیرکےکاریگر

بلا شبہ کشمیر کی روایتی اور قدیم گھریلو صنعتوں باالخصوص قالین بافی،شال بافی،پشمینہ سازی،ریشم سازی،نمدہ بافی ،ووڈ کارونگ اور پیپر ماشی وغیرہ سے جہاں کشمیریوں کو روز گار مہیا ہوا کرتا تھا، وہیں ان صنعتوں کی بیرونِ ریاستوںمیں برآمدگی سے بھاری آمدن ہوجاتی تھی اور ساتھ ہی پورے ملک بلکہ بیرونی ممالک میں بھی کشمیریوں دستکاریوں کا شہرہ رہتا تھا۔لیکن افسوس! کشمیر کی یہ قدیم صنعتیں اب مکمل طور زوال پذیر ہوگئی ہیں۔ان صنعتوں کو زوال پذیری میں نہ صرف یہاں کی حکومتوں کا غیر ذمہ دارانہ رول کار فرما رہا بلکہ خود یہاں کے لوگوں کا بھی بڑا ہاتھ رہاہے۔جو لوگ ان صنعتوں سے وابستہ تھے،وقت گذرنے کے ساتھ ساتھ انہوں نے دوسرے کام دھندے اختیار کرلئےاور جو لوگ ان صنعتوں کو زندہ رکھنا چاہتے تھے،وہ یہاں کے پُر آشوب حالات کی ستم ظریفی ،حکومتوں کی چشم پوشی وعدم توجہی سے لاچار ہوکررہ گئےاور اس طرح کشمیر کی قدیم دستکاریاں برائے نام ہوکر رہ گئیں۔چنانچہ کشمیری دستکاریوں کے نام پر امرتسر،جودھپور،اُتر پردیش اور کچھ دوسری ریاستوں میں قالین بافی ،شال بافی ،ووڈ کارونگ ا ور پیپر ماشی کو جس انداز سے فروغ ملا ،وہ کشمیری دستکاریوں کی زوال پذیری کے تابوت میں آخری کیل ثابت ہوا۔کیونکہ بیرون ریاستوں میں کشمیری دستکاریوں کے نام جو چیزیں تیار کی گئیں ،اُن کی تجارت نہ صرف ملک بلکہ بیرونِ ممالک میں کشمیری دستکاریوں کے نام پر شدو مد سے جاری رہی ۔گویاکشمیری دستکاریوں کی زوال پذیری میں کشمیریوں کا رول حد درجہ افسوس ناک رہا اورہر شعبہ کی طرح اس شعبے کو بھی ناپاک اور ناصاف بنانے میں کوئی کسر نہیں چھوڑی گئی۔جہاں دستکاریوں سے وابستہ بڑے بڑے تاجر اور کارخانہ داراِن دستکاریوں کی کوالٹی اور معیار کوگھٹاتے رہے اورنمبر دو کاروبار کے نام پر عام لوگوں سے سیلز ٹیکس وصول کرکے اُسے ہڑپ کرتے رہے تو وہیںیہ کاروباری حلقے اِن گھریلودستکاریوں سے وابستہ طبقہ، محنت کش کاریگروںاور ہتھکڑوں کا بڑے پیمانے پر استحصال کرتے رہےاور اُنہیں ،اُن کی اُجرت کا ایک تہائی حصہ بھی نہیں دیتے رہے،جس کے نتیجے محنت کش کاریگر طبقے نے مجبوراً دوسرے کام دھندے شروع کردیئے ۔گویا عالمی شہرت یافتہ کشمیری دستکاریوں کو بعض کشمیریوں نے محض اپنی خود غرضی ،لالچ اور فریب کاریوں سے داغدار بناکر روبۂ زوال بنادیا۔اسی طرح وادی کی زعفران صنعت کو بھی بے ضمیر تاجروں اور کاروباری حلقوں نے اپنی مکروہ چالوں سے ایرانی زعفران کے علاوہ نقلی زعفران کا کاروبار کرکےکشمیری زعفران صنعت کو داغدار کردیا۔وادیٔ کشمیر کی یہ بدقسمتی رہی ہے کہ اِسے ہر مسئلے اور ہر معاملے میں تباہ و برباد کرنے ،روبۂ زوال لانےاور پسماندہ بنانے میںغیروں کا اُتنا زیادہ رول نہیں رہا ،جتنا کہ اپنوں کا ہاتھ رہا ہے۔آج بھی صورت حال یہی ہے،سرکاری محکمہ ہو یا غیر سرکاری ادارہ،ان میں کام کرنے والے بیشتر لوگ خود ہی انہیں لوٹ کر تباہ و برباد کررہے ہیں، ذاتی مقاصد کے تحت ہر وہ شیطانی چال چل رہےہیں جو ان اداروں کے زوال پذیری کی وجہ بن رہے ہیں۔یہ بھی بتایا جاتا ہے کہ محکمہ ایمپوریم اور ہینڈی کرافٹس سے وابستہ بعض حکام اور افسران نے وہ طرزِ عمل اپنایاتھا ،جس سےبیرون ریاستوں اور بیرون ممالک میں وادی کی بچی کچھی قدیم صنعتوںکی کوالٹی پر ٹھپہ لگ گیا اور صورت حال یہاں تک پہنچ گئی ہے کہ اب وادی میں پیدا شدہ یا تیار شدہ کسی بھی اصلی چیز کو نقل کی نگاہ سے دیکھا جارہا ہے۔ ملک کی کسی بھی ریاست میں جب کوئی تجاری نمائش ہوتی ہے تو وہاں پر قائم کئے جارہے کشمیری اِسٹالوں پر زیادہ تر مال دوسری ریاستوں میں تیار شدہ ہوتا ہے، جنہیں کشمیر برانڈ کے نام پر بیچا جاتا ہے۔لوگ چونکہ بے دینی کے عالم میں لالچ میں گرفتار ہیں اور نام نہاد ترقی کے لئے ہر ناجائز کام کر بیٹھتے ہیں،بُرائیوں کو بُرا نہیں مانتےہیں،بد دیانتی کو غلط نہیں سمجھتے ہیں۔اگرچہ اس نقلی کاروبار سے کچھ لوگ مالا مال ہورہے ہیں لیکن اس طرزِ عمل سے کاروباری زندگی میں جو گندگی و غلاظت پھیل گئی ہے ،اس نے پورے معاشرے کو داغدار کردیا ہے۔گذشتہ پانچ سال کے دوران جموں و کشمیر کی یو ٹی انتظامیہ نے کشمیر کی دستکاریوں کو زوال پذیری سے نکالنے اور انہیں اپنے اصل مقام پر بحال کرنے کے لئے اگرچہ بہت سارے دعوے کئے اور کئی اقدامات بھی اٹھائے ہیں لیکن تاحال ان کا کوئی خاطر خواہ نتیجہ سامنے نہیں آرہاہے، ایسا کیوں ہورہا ہے،اس پر سنجیدگی کے ساتھ غورو فکر کرنے کی ضرورت ہے۔کیونکہ تواتر کے ساتھ یہاں کی گھریلو دستکاریاں گھٹتی چلی جارہی ہیںاور ان سے منسلک محنت کش کاریگر ،دوسرے ایسے کام دھندے اپناتے چلے جارہے ہیں،جن سے وہ زندگی کا گذر بسر کرسکیں ۔