عظمیٰ نیوزسروس
نئی دہلی//جموں و کشمیر اپنی پارٹی کے نائب صدر چودھری ذوالفقار علی نےان قیاس آرائیوں کے درمیان کہ وہ مرکز کے زیر انتظام علاقے میں اگلے ماہ ہونے والے اسمبلی انتخابات سے قبل بی جے پی میں شامل ہو سکتے ہیں، نئی دہلی میںمرکزی وزیر داخلہ امت شاہ سے ملاقات کی۔چودھری ذوالفقارجو ایک وکیل ہیں، نے 2008اور 2014کے اسمبلی انتخابات میں راجوری ضلع کے درہال اسمبلی حلقہ سے پیپلز ڈیموکریٹک پارٹی کے ٹکٹ پر کامیابی حاصل کی تھی۔ انہوں نے 2015سے 2018تک محبوبہ مفتی کی قیادت والی پی ڈی پی ۔بی جے پی مخلوط حکومت میں کابینہ کے وزیر کے طور پر خدمات انجام دیں۔جون 2018 میں بی جے پی کے حکومت سے الگ ہونے کے بعد اتحادی حکومت گر گئی۔ سابق وزیر الطاف بخاری کی قیادت میں پی ڈی پی کے بہت سے رہنماؤں نے بعد میں 2020میں اپنی پارٹی کی بنیاد رکھی اور علی اس کے بانی اراکین میں سے ایک تھے۔بی جے پی کے ایک رہنما نے کہا کہ علی نے دہلی میں وزیر داخلہ سے ملاقات کی اور جموں و کشمیر سے متعلق کئی مسائل بشمول اسمبلی انتخابات پر بات کی۔لیڈر نے کہاکہ انہوں نے بی جے پی میں شامل ہونے کے لیے اپنی رضامندی ظاہر کی ہے۔لیڈر نے کہاکہ انتخابات سے قبل ان کی شمولیت اس پارٹی کے لیے ایک بڑے فروغ کے طور پر سامنے آئے گی جو مرکز کے زیر انتظام علاقے میں اپنے طور پر حکومت بنانے کی کوشش کر رہی ہے۔
